Paarisap Tiktokimi immiussaq sakkortooq mianersoqqussutigigaa
TikTokimi immiussaq sakkortooq siammarterneqaleruttorpoq. Taamaammat Paarisa angajoqqaanut mianersoqqussuteqarpoq, meeqqammi immiussaq TikTok-imi, Facebookimi Instagramimiluunniit piarinaatsoorlutik takusoorsinnaammassuk. Namminersorlutik Oqartussat tusagassiuutinut nalunaarummi paasissutissiipput.
AAMMA ATUARUK Qeqqata Kommunia: Pas på ubehagelige og ulovlige videoer på TikTok
Paarisa Namminersorlutik Oqartussat ataanni pinaveersaartitsinermut inuiaqatigiinnilu pissutsinut aqutsisoqarfiup ataaniippoq. Taamaammat angajoqqaat meeqqatik immiussamik inoqatinut attaveqatigiiffikkut isiginnaagaqaratarsinnaanerat pillugu oqaloqatigissagaat Paarisap kaammattuutigaa.
TikTok sunaana?
TikTokimi filmiliaaqqanik nammineq isumassarsiorluni nutaaliaasunik naatsunik sanasoqarsinnaavoq, tassani nipilersuut atorlugu ussersorluni qitilluniluunniit imminut filmiliortoqarsinnavoq.
Filmiliaaqqap sivisussusaa nalinginnaasunik minutsit pingasuniit 15-inut takitigisarpoq.
ilmiliaaqqat nuannarinnittuniit malinnaasuniillu oqaaseqarfigineqarsinnaapput like-rneqarsinnaallutillu.
TikTokimik atuisuuniaraanni 13-inik ukioqalereersimanissaq piumasaqaataavoq, taamaakkaluartorlu suli 13-liineqanngitsut angajoqqaaminniit akuerineqarlutik atuisuupput.
Najoqqutaq: Qeqqata Kommunia
Tusagassiuutinut nalunaarut naapertorlugu TikTokip immiussaq nunguternialeruttorpaa.
Nunatsinni TikTokimi atuisup imminut toqunnissaminut piareersarnera ukioq manna apriilip qaammataani aamma siammarterneqarpoq. Taanna immiussap kingorna imminut toquppoq.
Pisoq taamani pillugu Qeqqata Kommunia angajoqqaanut meeqqami TikTokimik atuinerannut atatillugu ilitsersuuteqarpoq.
Ilitsersuut uani nassaarisinnaavat.
Ikiorneqarnissamik oqaloqateqarnissamilluunniit pisariaqartitsiguit Tusaannga oqarasuaammut 801180-imut imaluunnit SMS-ikkut 1899-ikkut attavigisinnaavat.
