Qeqqata Kommunia: TikTok pillugu qitornat oqaloqatigilluaruk
Imminut toqunnissamik piareersaateqartoq Tik Tokimut ikkussivoq, kingornalu imminut toqulluni. Qeqqata Kommunia tusagassiutinut taama nalunaaruteqarpoq.
- Tupinnanngitsunik inuppassuarnut aalassatitsivoq, Qeqqata Kommunia allappoq.
Taamaattumik Qeqqata Kommunia angajoqqaanut siunnersuuteqarpoq.
Meeqqat arlallit Tik Tokimik atuisuummata, TikTokip qanoq atornissaanik qanorlu atunnginnissaanik angajoqqaat meeqqaminnik oqaloqatiginninnissaat Qeqqata Kommuniata ilaatigut kaammattuutigaa.
TikTokimi filmiliaaqqanik nammineq isumassarsiorluni nutaaliaasunik naatsunik sanasoqarsinnaavoq, tassani nipilersuut atorlugu ussersorluni qitilluniluunniit imminut filmiliortoqarsinnavoq.
Filmiliaaqqap sivisussusaa nalinginnaasunik minutsit pingasuniit 15-inut takitigisarpoq.
ilmiliaaqqat nuannarinnittuniit malinnaasuniillu oqaaseqarfigineqarsinnaapput like-rneqarsinnaallutillu.
TikTokimik atuisuuniaraanni 13-inik ukioqalereersimanissaq piumasaqaataavoq, taamaakkaluartorlu suli 13-liineqanngitsut angajoqqaaminniit akuerineqarlutik atuisuupput.
Najoqqutaq: Qeqqata Kommunia
- Qitornat oqaloqatigiuk arlaannik nuanniilliuuteqaruni nanertuuteqaruniluunniit TikTokkikkut saqqummiunnagu inersimasumut saaffiginnissasoq, taamaaliornikkut ikiorneqarnissaq qulakkeerluarneqarsinnaammat, Qeqqata Kommunia allappoq.
Kikkut takusinnaaneraat aalajangerneqarsinnaavoq
Filmiliaaqqat nammineq ikkussat nunarsuaq tamakkerlugu takuneqarsinnaassanersut nalunngisalluunniit kisimik takusinnaassaneraat aalajangerneqarsinnaasoq, Qeqqata Kommuniata eqqaasitsissutigaa.
TikTokip qinngasaarisanerit akiorniarlugit iliuuseqartaraluartoq inuit ilaat qinngasaarillutik nakkarsaallutik illaruaatiginnillutillu allassinnaasut, Qeqqata Kommunianit eqqumaffigeqquneqarpoq.
- Qitornat ilitsersuutiguk qinngasaarinernik naammattuuigaangami inersimasunut oqartaqqullugu, qanorlu qinngasaarinerit eqqunngitsumillu pissusilersornerit TikTokikkut unnerluutigineqarsinnaanersut.
Qeqqata Kommuniata siunnersuutai uani atuarsinnaavatit.