Paamiuni ikuallattup pissutaa: Naneruut sikaritsiluunniit ikuallatsitsisimasinnaasoq
- Ikuallattumut pissutaasumut atatillugu ikuallattup aallaavia ineeqqamit aalajangersimasumeersuusoq takusinnaavarput, ikuallannerlu naneruutinit siniffimmiluunniit pujortartoqarneranit pissuteqarsimasinnaasoq qulakkeerlugu oqaatigineqarsinnaavoq.
Politiit pisortaata tullersortaa, Sebastian Bech ikuallattoqarsimaneranik misissuisut maannamut paasisimasaat pillugu oqarpoq.
AAMMA ATUARUK Paamiuni ikuallattumit annattoq: Annanniarlunga pissippunga
Paamiuni ikuallattoqarnerani inissiaq sisamanik sinittarfilik ikuallappoq, inilu ikuallattoq inissiani quleriiaanni siullermiilluni.
Inimi ikuallannerup aallartinnerani inissiami inuit minnerpaamik 20-upput. Inuit qassiiusut uutiternitik ininiillu pissinnertik pissutigalugu ajoqusernertik pissutigalugu Paamiuni napparsimmavimmut unitsinneqarput.
Pinerluuteqartoqarsimannginneraraat
Ikuallattoqarsimatillugu misissuisartut toqusunillui misissuisartut Danmarkimiit Paamiuni politiinut ikiuukkiartorlutik Paamiunut sapaatip-akunnerata siuliani sisamanngornermi tikipput.
Politiit pisortaata tullersortaata politiit ikuallattoqarnerani pinerluuteqartoqarsimannginneraraat nassuiaatigaa.
AAMMA ATUARUK Kalaallit Nunaanni Politiit: Utoqqaliarsaartut pingasut ajunaarput
- Pinerluuteqartoqarsimannginnera oqaatigineqarsinnaavoq. Tamanna politiinut pingaaruteqarluinnarpoq, Sebastian Bech KNR-imut oqarpoq.
Ikuallattoqarsimatillugu misissuisartut suliassaasa tulliat
- Ikuallattoqarsimatillugu misissuisartut nalunaarusiornissaat tullinnguupput, taamaalilluni politiit suliaannut ilaalissalluni. Nalunaarusiat tamarmik tunniunneqareerpata suliaq naammassineqarlunilu matuneqassaaq.
- Suliami matumani pinerluuteqartoqarsimannginneranik pissuteqarpoq. Politiit misissueqqissaarnerat ikuallattoqarsimatillugu misissuisartut misissuinerisa inernerannut atassuserlugu suliami matumani inerniliussinnaavarput.
Nuummi Politiit Paamiunut ikiuukkiartortitsillutik sulisuminnik aamma aallartitsitsiniarlutik aalajangersimapput. Taakku sapaatiummat angerlaqqissimasut, Sebastian Bechip nassuiaatigaa:
- Ikuallattoqarneranut misisssueqqissaartussanik ikiuukkiartortussanik aallartitsisoqarpoq.
Inuit pingasut ajunaartut: Ikiuigasuariartortut aallartinneqartut
Paamiuni inissiani ikuallangaatsiartoqarnerani inuit pingasut ajunaarput.
Arnaq 61-inik ukiulik angutillu marluk 54-inik 62-inillu ukioqartut ajunaarput.
AAMMA ATUARUK Ikiuigasuariartortut Paamiunut tikittut: Tarnip pissusianik ilisimasalimmik pisariaqartitsisoqartoq
Kommuneqarfik Sermersuup ikiuigasuariartartuinit tarnip pissusianik ilisimasallit marluk Paamiuliartinneqarput.
Taakku inunnut inuit pingasut ajunaarnerannik kinguneqartumik sisamanngornerup unnuaani ikuallattoqarnerani peqataasimasunut ikiuigasuassapput.
