Paamiuni ikuallattumit annattoq: Annanniarlunga pissippunga
- Imminut nivinngaarteriarlunga pissippunga. Ikuallagussaaliivillunga annaffissara kingulleq pissittariaqarama.
Paamiuneersoq, Aaneeraq Petersen oqarpoq.
Inuit pingasut Paamiuni inissiani ataatsimoortuni ikuallarujussuartoqarnerani ajunaarput.
Inissiani quleriiusuni siullermi sisamanik initalimmi ikuallattoqarnera unnuaq pingasunut qiteqqutilersoq nalunaarutigineqarpoq. Inuit qassiiusut ikuallattumi uutitersimanertik inissianiillu pissinnerminnit ajoqusersimanertik pissutigalugu Paamiuni napparsimmavimmi uninngapput.
Allamik aqqutissaqanngitsoq
Aaneeraq Petersen inissiat quleriit siulliannit pissittariaqarsimasut ilagaat. Taassumami pissinnissani kisiat aqqutissaraa.
Privatfoto: Aaneeraq Petersen.
Inissiaq marlunnik qulereeqarpoq.
Paarlersuaq pujungaatsiarsimavoq. Paatsiveerusimasoqarlunilu paatsuungasoqarsimalluni. Misigisinaq tujorminarluinnartoq Aaneeraq Petersenip suli tupaqqangaatsiartup oqaluttuaraa.
- Tassanngaannaq pujoq isaaleriasaarami tamatta paatsiveerulluta, tupannaqaaq.
AAMMA ATUARUK Paamiuni inuit pingasut ikuallattoqarnerani ajunaartut
Taassuma inuit allat ilagalugit erngussimapput. Ikuallannerata paatsiveerussutigineqarnerata nalaani inuk alla ilagalugu ineeqqamut qimaasimapput matulu matusimallugu.
Qimaaqatigisaa ikuallattumit qimaaniarluni igalaakkut pississivoq. Pissiffissarli portummat Aaneeraq Petersenip pissinniassani ersigisimavaa. Taamaammat allamik aniffissarsioqqaarsimavoq. Allakkoornissarli kingusinaarsimalluni.
- Sinittarfimmiit inimut matu ammarakku pujumut ingerlaannaq aporpunga, matoqqiinnarpara. Ini pujungaarmat qernertuinnaavoq.
Sapiissuseqarniartariaqarsimasoq
Aaneeraq Petersen allakkut qimaasinnaannginnami pissittariaqarsiamvoq. Sinittarfimmi kissakkiartuinnarlunilu pujornera sakkortusiartuinnarsimavoq. Pissinniarnerminulli sapiissuseqarniarlunilu piffissaqartariaqarsimavoq.
- Pissinnissara ersingalugu sivisuumik anillanneq ajuleraluarpunga, portungami, Aaneeraq Petersen oqarpoq.
Naalli portusuumi pissinnissaq qununarsimagaluartoq taama aalajangernera Aaneeraq Petersenip inuuneranut annassutaavoq.
- Pississimanngitsuuguma immaqa ipillunga toqusimassagaluarpunga. Pujup iluani ipianngunerpaaffissanniillunga pissippunga.
Politiit suliamik misissuisut
Inissiap ikuallannera qaminneqarpoq.
Nuummi Politiit Paamiuni Politiit ikuallattoqalerneranik misissuinerannik misissueqqissaarnerannillu ikiuuttut, Kalaallit Nunaanni Politiit pigaartuata oqaatigaa.
Ikuallassimasunik paasiniaasartut toqusimasunillu misissuisartut Danmarkimeersut ikuallattup paasiniarluarnissaanut ikiuukkiartortinneqarput.
