- Inuit eqqissiviilliorput, aamma uippakajaartut malugisinnaavara, Kristian Dahl oqarpoq. Assi: Morten Heilmann, KNR

Ikiuigasuariartortut Paamiunut tikittut: Tarnip pissusianik ilisimasalimmik pisariaqartitsisoqartoq

Paamiuni ikuallattoqalernerani inuit ikinnerpaamik 20-t inissiamiipput – inuusuttorpassuillu ilaallutik. Taakkunannga amerlasuut ikiorneqarnissamik pisariaqartitsisut, ilaqutariinnut immikkoortortaqarfiup aqutsisua oqarpoq.

Kommuneqarfik Sermersuup ikiugasuariartortartuinit tarnip pissusianik ilisimasallit marluk Paamiunukarput.

Taakku inunnut marlunngornerup unnuaani inuit pingasut ajunaarnerannik kinguneqartumik ikulallattoqarnerani akuusimasunut ikiuigasuassapput.

Inissiami sisamanik sinittarfilimmi ikuallattoqarpoq, inissiamilu ini ikuallattoq quleriiaanni siullermiilluni.

AAMMA ATUARUK Paamiuni ikuallattumit annattoq: Annanniarlunga pissippunga

Inimi ikuallannerup aallartinnerani inissiami inuit minnerpaamik 20-upput – taakku ilarpassui inuusuttuupput. Taakkunanngalu ameralsuut ikiorneqarnissamik pisariaqartitsipput, Kristian Dahl oqarpoq. Taanna Kommuneqarfik Sermersuup Paamiuni ilaqutariinnut immikkoortortaqarfiani aqutsisuuvoq.

- Inuit eqqissiviilliorput, aamma uippakajaartut malugisinnaavara, taanna oqarpoq.

- Ikiuigasuariartortartunit marluk inunnik maanna ataatsimoortitsipput. Erngertumik ikiorneqarnissamik pisariaqartitsisut oqaloqatigissavaa. Toqqaannartumik eqqugaasut soorunami ajornerupput. Toqqisimanngillat, aqutsisoq oqarpoq.

Tarnip pissusianik ilisimasallit pisariaqartitsinneqartut

Ikuallattoqarsimatillugu misissuisartut toqusunillui misissuisartut Danmarkimiit Paamiunut politiinut ikiuukkiartorlutik tikipput. Kristian Dahlillu oqarnera naapertorlugu ikiorneqarnissamik pisariaqartitsisoqangaatsiarpoq.

- Inuit ataasiakkaat ataatsimoortinnissaat pisariaqarpoq. Qatserisartulli namminerlu kajumissutsiminnik ikiuuttut aamma ikiorneqarnissamik pisariaqartitsipput.

AAMMA ATUARUK Paamiuni inuit pingasut ikuallattoqarnerani ajunaartut

Naalakkersuisut ikiuisoqarnissaanik suli pisariaqartitsisoqarpat ikiuinissamut piareersimapput. Tarnip pissusianik ilisimasallit aamma pisariaqartinneqartut, Kristian Dahlip erseqqissaatigaa.

- Paasisakka naapertorlugit tarnip pissusianik ilisimasallit marluk maaniittut sapaatip-akunnera ataasiinnaq maaniissapput. Tamatumali sivitsorneqarnissaa periarfissaavoq.

Paamiuni inissiap ikuallanneranut pissutaasoq politiinit suli paasineqanngilaq.

Ikuallattoqarnerani arnaq 61-inik ukiulik angutillu marluk 54-inik 62-inillu ukiullit ajunaarput.

Inuit qassiiusut uutitersimanitik pissutigalugit napparsimmavimmi uninngapput. Aammattaaq inuit ilaat ilagaakkut pissinnerminni ajoqusersimapput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat