Martha Lund Olsen oqarasuaatikkut naalakkersuisuujunnaarpoq
Akunnialunngiut qaangiutiinnartut Naalakkersuisut siulittaasuat Kim Kielsen, Martha Lund Olsen najuutsinnagu tusagassiortunik katersuutitsivoq. Kim Kielsen maani nassuiaavoq Martha Lund Olsen kommuninut qinersinissamut qineqqusaarniarnini peqqutigalugu Naalakkersuisunit tunuartinneqartoq.
Taama aaalajangerneq Kim Kielsenimit tiguneqarpoq.
Suli aalajanginngitsoq
- Siumut siulersuisuunerit ataatsimiinneranni oqaatigivara ussernartorsiorsinnaallunga kommunalbestyrelsimut qineqqusaarnissannut peqqutigalugu inunnut tunngasorpassuit kommunalbestyrelsip akisussaaffigisarmagit, maanna nalakkersuisuusimasoq Martha Lund Olsen taama oqarpoq, erseqqissaatigalugulu kommuninut qineqqusaarniarnini erseqqareqqissaartumik oqaatigisimanagu, isummanilu inaarutaasumik tassani suli aalajangiussimanagu.
- Soorlu oqartunga, ussernartorsiutigaara aamma ussernartorsiorfigaara. Taava pisut sukkasoorujussuarmik ingerlapput. Naalakkersuisuujunnaarpunga, naalakkersuisuujunnaarnerma kingorna soorunami taanna ussernartorsiutigisara aamma eqqarsaatersuutigisorujussuuvara, aamma Nuummi Siumut partiaata siulersuisui arfininngormat naapimmata qineqqusaartussanut peqataavunga, Martha Lund Olsen taama oqarpoq.
Nangilluni nassuiaavoq tusagassiuutinut katersuutitsinermi peqataannginnini peqquteqarluartoq, tassami suliffimminut atatillugu angalernerani tamanna pivoq.
- Kangerlussuarmut tikillunga aatsaat paasivara taamaattoqalersoq
- Kangerlussuarmut tikillunga aatsaat paasivara taamaattoqalersoq, taavalu aatsaat unnukkut utimut apuussinnaasimallunga. Tassa paasitinneqarpunga tusagassiortunik katersuutsitisoqassasoq, aammalu taamatut Kim Kielsen aalajangersimasoq, naalakkersuisuujunnaassasunga, akisussaaffillu Muté Bourup Egedip tigugaa upernaaru ataatsimiinnissap tungaanut, Martha Lund Olsen oqarpoq.
Nangilluni oqatigaa aalajangerneq Kim Kielsenimiissimasoq.
- Soorunami pisut sukkasuumik ingerlapput, kisianni aamma tassa naalakkersuisut siulittaasuata taanna inuiaqatigiinnut pitsaanertut nalilersimavaa. Taanna aamma ataqqivara. Piffissami aggersumi qanoq sussanerlungalu soorunami aamma eqqarsaatersuutigivakka, Martha Lund Olsen oqarpoq.
