Niisarnat 200-nit amerlanerit Australiap sineriaani tippussaasimasut
Niisarnat 270-it Australiap kujasissortaani Tasmaniap kimmut sineriaani tikikkuminaatsumi tippussaasimasut ataasinngornermi siumorneqarput, annaassiniarnersuarlu aallartinneqarpoq.
AAMMA ATUARUK Nanortallip eqqaani 15-inik niisarnattoqartoq
Niisarnat 25-t marlunngornermi ullaakkut avalatsinneqarsinnaasimapput, niisarnalli allat 90-t toqusimallutik. Aviisi The Guardian taama allappoq.
Niisarnat ataatsimoortukkuutaat marluk Tasmaniap kimmut sineriaani tippussaasimapput. Qeqertap Tasmaniap kippasissortaani inugasaanngitsumi Macquarie Harbourimi sumiiffinni pingasuni tippussaasimapput.
Inuit 60-it missaat annaassiniaqataapput. Nammineq kajumissutsimik ikiuuttut tamaanilu aalisartut aamma annaassiniaqataapput.
Niisarnanik annaassiniarneq imaannaanngitsuusoq, imaani uumassusillit pillugit immikkut ilisimasalik Kris Carlyon oqarpoq. Nutaarsiassaqartitsivik AFP taama allappoq.
Ulluni tulliuttuni marlunni annaassiniartoqarsinnaasoq, Carlyon oqarpoq. Niisarnat aniguinissamik periarfissaqarnerusorineqartut salliutinneqassasut taanna oqarpoq.
AAMMA ATUARUK Niisarnat 600-t New Zealandimi tipisimasut
Tippussaasimanerannut suut pissutaasimasinnaanersut immikkut ilisimasallit erseqqissumik oqaatigisinnaanngilaat. Niisarnat nerisassarsiornerminni nalinginnaasumik aqqutigisartakkaminnit allakkut ingerlaarnerminni tippussaasimasinnaasut ilaatigut oqarput.