Otto Ingemann Folketingemut qinersinissamut piareerpoq. Assi: Megan Hansen

Otto Ingemann Folketingemut qinersinissamut piareertoq

Kalaallit Folketingemut qinersisut amerlagisassaarpiartanngillat. KNR-ili novembarip aallaqqaataani qinersiartussamaartunik pingasunik oqaloqateqarpoq.

Folketingimut marlunngornermi novembarip aallaqqaataani qinersisoqassaaq.

 

Kalaallilli Folketingimut qinersisartut amerlagisassaarpiartanngillat. Folketingimummi 2019-imi juunimi kingullermik qinersisoqarmat, kalaallit taamaallaat 49,8 procentii qinersipput. 

2015-imilu qinersisoqarmat, nunatta inuisa 50,4 procentii qinersipput.

KNR-ilu Folketingimmut qinersisussanngornermut tunngatillugu apersugassarseqqatarpoq. Apersorniaraluagaatami ilarpassuisa qinersinissaq soqutiginagu oqaatigaat.

Brugseni Nuummili apersugassarsivoq, taannalu Otto Ingemannimik ateqarpoq:

AAMMA ATUARUK Nunatsinni partiit Folketingimut qineqqusaarnermi pingaartitaat makkuupput

- Aap, qinersiuaannartuuvunga ajunngikkaangama, taanna KNR-imut oqarpoq.

Kina imaluunniit parti sorleq qinissamaarpiuk?

- Soorunami Siumut. Allamik qinigassaqanngilaq nunatsinni partiit sinneri tamarmik ajoramik.

Nunatsinni pingaarnertut suna qineqqusaarutigineqartariaqarsoraajuk?

- Kissaateqarpallaanngilanga, utoqqaligama aamma eqqarsaatigivallaarunnaarnikuuakka tamakkua.

Politikerertatta Folketingimi pingaarnertut suut suliassaraat?

- Alapernaarsuutit nutaanngilillutik atorsinnaajunnaalersut nutaanik taarsernissaat qineqqusaarutigissagaat neriuppunga, Otto Ingemann oqarpoq.

 

Malene Broberg

 

Malene Broberg Brugseni Nuup silataani naapitatta aamma ilagaat.

Kina qinerniarpiuk?

- Apeqqutaavoq kikkut pimoorussinersut, Malene Broberg oqarpoq.

Nunatsinni pingaarnertut suna qineqqusaarutigineqartariaqarsoraajuk?

- Utoqqaat meeqqallu pingaarnerpaapput sullilluarneqarnissaat.

Qanoq?

 - Inuuniarnikkut maannakkut ilungersunartoq paasisarakkit utoqqaat ingammik, soorlu qaammamusiaat annikitsuarakasiupput suleruloornikuugaluarlutik. Tamakkua aaqqiiffigineqarnissaat kissaatiginaqaaq.

AAMMA ATUARUK Siumumi Folketingimut sassartut – palasi ilisarisimasaasoq ilaavoq

Politikerertatta Folketingimi pingaarnertut suut suliassaraat?

- Takornariaqarneq. Nunarput kivinniarutsigu tamakkua pingaarnertut immaqa inissikkallarneqarsinnaapput, Malene Broberg oqarpoq.

 

 Dorthie Jensen

 

Saqqameersup Dorthie Jensenip qinersinissi aamma ilimagaa.

- Periarfissaqassaguma qinersissuunga, taanna oqarpoq.

Parti sorleq qinissamaarpiuk?

- Partii sorleq qinissanerlugu suli aalajanginngilanga.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl