Oslomi saassussisoqarsinnaaneranut sillimaniarput

Oslop  Universitetiata eqqaani nakkutilliisoq marlunngornerup pingasunngornerullu unnuaani aallaaneqarpoq, kingusinnerusukkullu aamma tamaani qaartartumut assingusumik nassaartoqarluni.

Taamaattumik illoqarfiup ilaa tamanna politiinit misissuiffigineqalerpoq, soorlu aamma universitetip ilarujussua assersorneqalerluni. Universitetilu timmisartumik qulaallugu timmisoqarnissaa ullaap tungaani inerteqqutigineqalerluni.

Qaartartuusorineqartorli misissuiffigeqqissaarneqarmat ulorianaateqanngitsoq paasineqarpoq.

Oslomi politiit ullaap tungaani tusagassiortunik katersortitsinerminni taama ilisimatitsipput.

- Qaartartuusorineqartoq qaartartuliarineqartartunut assingulluinnarpoq. Qunusaarutigalugu inissinneqarsimanissaa politiit ilimagaat.

Unnuarli eqqaassisoqarnera politiit suli misissuiffigaat, tamannami toqutseriarnertut isigineqarami.

Eqqaassisoqarneranut atatillugu angutit marluk takuneqartut suli tigusarineqanngillat.

Nakkutilliisoq aallaaneqartoq annerusumik ikilerneqanngilaq. Taanna sakissamigut aallaaneqarpoq, aqerlumilli pitarneqarsinnaanngitsumik aatsoqarluni. Taassuma aallaaneqarnini nalunaaqutaq 02.45-nngortoq nammineerluni politiinut nalunaarutigaa.

Ukiup ataasiunngitsulluunniit ingerlanerani universitetip eqqaani nakkutilliisumik saassussisoqarpoq.