Ritzau Nunanit allanit

Oslomi nakkutilliisoq imminut aallaasimavoq

Norgemi Oslop universitetiata eqqaani nakkutilliisoq ippassaq aallaaneqartutut oqaatigineqartoq, nammineerluni taamaaliorsimavoq.

Allattoq Ritzau

aggustip 06-at 2015 13:24

Nutserisoq Elisa Isaksen

Paasinarsivormi taanna imminut aallaalluni ikilersimasoq aamma qaartartumut assingusumik inissiisimasoq, tamakku pissutigalugit Oslomi angallanneq nalunaaquttap akunnerpassuini assersorneqartariaqarsimavoq.

Nakkutilliisoq aqerlunit tallimanit eqqorneqarsimasoq, Ullevålip napparsimmavissuani ippassaq pilattarneqarpoq.

Tamatumali kingorna taanna politiinit killisiorneqarnermini imminut aallaasaqattaarsimalluni nassuerpoq.

Aamma atuaruk Oslomi saassussisoqarsinnaaneranut sillimaniarput

Nakkutilliisup imminut aallaasaqattaarsimanera qanoq ilillutik pasitsaassimaneritsik politiit oqaatigerusunngilaat. Iliuuserisimasaanullu pissutaasup misissuiffiginissaanut maanna siusippallaartoq aamma oqaatigaat.

Aallaat atorneqartoq nanineqareerpoq arsaarinnissutigineqarlunilu. Taassuma nassaarineqarsinnaaneranut nakkutilliisoq ikiuussimavoq. Pineqartumut atatillugu allanik akuusoqarsimasinnaaneranik politiit misissuillutik suli aallartinngillat.