Oscarimik agguaanermi atukkanik kjuuliliortoq: Angusarissaarutini anginerpaanut ilaavoq

Kjuuliliani aappaluttut avittaasallit marluk Oscarimik agguaanermi atorneqarmata, Louise Lynge Berthelsen tulluusimaarlunilu tipaatsuataarpoq.
Paninnguaq Heilmann Louise Lynge Berthelsenip kjuuliliaanik avittaasalimmik Oscarimik ukiormanna agguaanermi atorpoq. Assi © : Paninnguaq Heilmann
marsip 17-at 2023 06:59
Nutserisoq Hanne Petersen

Atisaliortartoq Nuuk Couturemik piginnittuusoq, Louise Lynge Berthelsen, sapaatiummat unnukkut puiunaatsorsivoq.

Filmimimi “Ivalu”-mi pingaarnertut inuttaasoq, Mila Heilmann Kreutzmann, taassumalu arnaa, Paninnguaq Heilmann, Louise Lynge Berthelsenip kjuuliliaanik avittaasalinnik Oscarimik agguaanermi atorput.

- Tulluusimaaqaanga. Imminut kisima pinnanga aammali kalaaleqatikka sinnerlugit, Louise Lynge Berthelsen oqarpoq.


Isiginnaartut 18 millionit

Taanna Oscarimik agguaaneq sapaatiummat aallakaatinneqarmat isiginnaartunut 18.7 millioniusunut ilaavoq.

Misigisaq tamanna Louise Lynge Berthelsenimut uppernangingajassimavoq.

Taassumammi atisaliaasa ilaat nittarsaanneqavissorput, atisaliortartullu amerlanerpaartaat assinganik misigisaqarnissamik takorluuinnarsinnaasarput.

- Atisaliortartummi kikkulluunniit suliaminnik Oscarimik agguaanermi atuisoqarnissaa takorluuisarmata tulluusimaartorujussuuvunga, taanna oqarpoq nangillunilu:

- Angusarissaarutinimi anginerpaanut ilaavoq.

Kalaaleqatitta atisaliai qangatoorpalaartullit kjuulit aligoqqiusarasaat akornanni

Tusaamasat Oscarimik agguaanermi atisaat akisoqisuukkajuttut uitsatigineqartaqisunut ilaapput.

Louise Lynge Berthelsenillu kjuuliliai aappaluttut avittaasallit kjuulit aligoqqiusarasaat Oscarimik ukiormanna agguaanermi atorneqartut akornanni takussaapput.

- Atisaliakka avittaasanik 2013-imi ilisarnaaqqusertalerpakka. Avittammi kulturitsinnut ilaalluinnarmata, kjuuliliama Oscarimik agguaanermi atorneqartut avittaasaqarnissaat pingaartippara, taanna oqarpoq.

Louise Lynge Berthelsenili taakkuninnga kjuuliliornera oqitsuinnaasimanngilaq.

Mersortussanngoramigimmi Mila Heilmann Kreutzmann aamma Paninnguaq Heilmann Danmarkimiipput.

Taamungaannartariaqarsimagai

- Mersortussanngorakkit kjuuliliuussassakka Nuummiinngitsut nalunngilara. Taamaammat kjuuliliuussassakka ilumut uuttortaqqaarnagit mersuutissanerlugit nangaaleraluarpunga, taanna oqarpoq.

Misiliisariaqarsorigamili taamaaliorniarluni aalajangerpoq.

- Uuttuutiminnilli ilissiutissannik nassimmannga mersuutilerpakka. Mersuunnerini sumut killinnerlunga takutinniarlugu titartakkannik assinillu nassillattaarpakka.

Kjuulilianilu Mila Heilmann Kreutzmannip Paninnguaq Heilmannip Oscarimik agguaanermi peqataajartorlutik Los Angelesimukarnissaannut ulloq ataasiinnaanngortoq naammassigamigit Danmarkimut nassiuppai.

- Naammassinissaannut ullorpassuit unnuppassuillu atorpakka. Uuttuutitik ilissiutissakka sapaatit akunnerata siuliani aatsaat nassiummatigik naammassinissaannut ulapaarpunga, taamaammat assakka maanna eqakujupput, Louise Lynge Berthelsen oqarpoq.