Oscar akademiep arnat amerlanerusut aggersarai

Oscar Akademimi ilaasortanngortut nutaat 842-t affaat arnaapput, 30 procentingajaalu taartumik ameqarput.
Allattoq Ritzau
juulip 02-at 2019 12:12
Nutserisoq Connie Fontain

Oscar Akademiep ilaasortanngortinniarneqartut nutaat 842-t aggersarpai, taakkua affaat arnaapput.

Arnat ilaasortanngortinniarneqartut aggersarneqartut affaannik siullermeertumik amerlassuseqartut, nutaarsiassaqartitsivik AFP allappoq.

Akademiep immikkoortuisa affaanit amerlanerusuni, ilaatigut ilitsersuisunut, ingerlatsinermut pisortanut tunngasuniittuni aggersarneqartut arnat angutinit amerlanerupput.

Akademiep ilaasortaasa suiaassusii inuiaassusiisa naammattumik assigiinngiiaannginneralugit ukiorpassuarni isornartorsiorneqartarput.

Oscarimik 2015-imi 2016-imilu aallakaatitsinerit ”Oscar So White”-mik, tassa "Oscar taama qaamatigisumik" taaguuserneqarput, isiginnaartitsisartut innersuunneqartut qaamasumik ameqarrannerat pillugu.

Ilaasortassat ukioq manna aggersarneqartut 842-sut 30 procentingajaat taartumik ameqartuupput.

Taartunik amillit aggersarneqartartut 2015-imi 8 procentiusinnarlutik 16 procentimut amerliartorsimapput.

Tamatuma saniatigut arnat aggersarneqartut 25 procentimiit 32 procentimut amerlipput.

Qanittumi aggersarneqartuni Lady Gaga, Adele, Claire Foy aamma "The Square"-imi isiginnaartitsisartoq maanna isiginnaagassiami nangeqattaartartumi "The Handmaid's Tale"-mi peqataasoq, Elisabeth Moss aggersarneqartunut ilaapput.

Akademimi ilaasortat qasserpiaanersut ilisimaneqanngilaq. Siusinnerusukkut ilaasortat 6000-imut killeqarnikuupput, taakkuali maanna 9000-it missaaniissinnaasut, AFP missiliuivoq.

Danskit filmiornermi suliaqartut Akadamiemut aggersarneqartarnerat qaqutigoortuunngilaq. Danskit isiginnaartitsisartut qulit 2016-imi ilanngunneqarput, matumani isiginnaagassiami ilitsersuisartut Nicolas Winding Refn aamma Tobias Lindholm ilaapput.