Oquk pissutigalugu savaatilinngorniat ilinniarfiat nuuttariaqalertoq
Upernaviarsummi savaatilinngorniat ilinniarnertik Narsami aallarteqqissavaat.
Ilinniartut inaanni atuartitsiviusunilu oqummik nassaartoqarsimanera pissutigalugu tamanna pivoq.
Ilinniartitaanermut, Kulturimut, Timersornermut Ilageeqarnermullu Naalakkersuisoqarfik tusagassiuutinut nalunaarumminni taama allappoq.
Oqunnera pissutigalugu ilinniartut sulisulllu peqqinnerat pillugu nuuttariaqalerput.
- Nutsertariaqalernermi eqqorneqarsimasut Naalakkersuisoqarfimmiit ajuusaarfigineqarput, peqqinnissarli pitsaasumillu atugaqarluni ilinniarnerit ingerlanneqarnissaat pingaartinneqarmata taamatut iliornissaq pinngitsoorneqarsinnaanngilaq, tusagassiuutinut nalunaarummi taama allassimavoq.
Upernaviarsummi illut pisoqaliartorneri ukiorpaalunni ilisimaneqarpoq. Taamaammallu Inuit Ataqatigiinneersup, Mariane Paviasenip 2022-mi siunnersuutigigaluarpaa ilinniarfik Narsamut nuunneqassasoq, INUILI (Inuussutissalerinermik ilinniarfik) aamma tassaniilluni.
Isumassarsiarlu taanna piviusunngulerpoq. Atuartitsinerimmi INUILI-p inaanni nanginneqassapput.
Sulisut ilinniartullu INUILI-mut nutsernerannut saniatigut partiit isumaqatigiissusiaminni Narsaq nammineq pilersornerup tungaatigut ilinniarfeqarfittut siammasinnerunissaa anguniagaraat.
Upernaviarsummi illut eqqugaasut qanoq pineqarniarnersut pilersaarutiginissai maanna sulissutigineqaleruttorpoq.
