Oqartussaaqataatitsiniarneq politikerinit assortuussutigineqartoq
Kommunalbestyrelsemut qinerseriaaseq pillugu Naalakkersuisut inatsisissatut siunnersuutaat, Inatsisartuni ippassaq oqallisigineqarpoq. Naalakkersuisut siunnersuutigaat, sumiiffinnit qinikkat, kommunit nunatsinni 18-ugallarmata aaqqissuussaanerup assigatut ullumikkut qinigaasoqartassasoq, tassa sumiiffiit tamarmik minnerpaamik ataatsimik aallartitaqartarnissaat siunnersuutigalugu.
Taamaa Naalakkersuisut siunnersuuteqarnerat, Demokraatinit isumaqatigineqanngilaq.
- Assersuutigalugu imaappoq, inuit marluk qinerneqartut qiviaraanni aappa 400-nik qinerneqartoq aappaalu 40-nik qinerneqarluni, taassumalu 40-innarnik qinigaasoq kommunalbestyrelsemut ilaasortanngussaa suminngaanneernini piinnarlugu. Taama pissuseqarneq uagut inuit ataasiakkaat oqartussaaqataanerattut oqaatigisinnaanngilarput, Demokraatit sinnerlugit Inatsisartunut ilaasortaq, Andreas Uldum oqarpoq.
Taassuma nassuiarpaa, inuit ataasiakkaat oqartussaaqataanerisa innarlerneqannginnissaa Demokraatinit qanoq isiginerlugu.
- Massakkut ataatsimeeriaaseq imaattarpoq, tassa ataatsimiinnerit ilaat videot atorlugit ingerlanneqartarluni. Tassami ilisimavarput qinigaasut ataasiakkaat kommuni tamaat sullittarmassuk nunaqarfinnut illoqarfinnulluunniit angalasarlutik. Uagullu pingaartipparput, qinigaasut ataasiakkaat ilisimassammassuk kommuni tamaat sullikkamikku taamaattumillu simiiffinnit ataasiakkaanit ilasortaasariaqarani, Andreas Uldum oqarpoq.
Siumup Inatsisartunut ilaasortaata, Doris Jakobsen oqarpoq, Demokraatit isumaat atuutsinneqalissagaluarpat, inuit ataasiakkaat oqartussaaqataanerat innarlerneqassasoq.
- Inuit ataasiakkaat oqartussaaqataanerat periarfissaarutsinneqassaaq Demokraatit siunnersuutaat atuutsinneqalissagaluarpat, taamaattoqassappallu tamanna inuit ataasiakkaanut ataqqinnginnermik ullutinnullu tulluutinngitsumik aaqqiissoqassagaluarluni, Doris Jakobsen oqarpoq nangillunilu ima nassuiaalluni.
- Siumumit isumaqarpugut, kommunerujussuit iluini qinigaaffinnit taakkunanit, illoqarfinnut imaluunniit nunaqarfinnut nuussinnaanissaq pisinnaatitaaffiusariaqartoq, tassami kommunerisap iluaniittuartilluni qinigaasinnaaneq periarfissaasariaqarpoq pinngitsoorani, Doris Jakobsen oqarpoq.
Taassuma isumaata asserluinnaanik, Inuit Ataqatigiit Inatsisartunut ilaasortaatitaa, Juliane Henningsen qaammatip ataatsip matuma siorna isummersorpoq, tassalu sumiiffiit pisinnaatitaaffigisariaqaraat ilaasortaatitaqarnissaq.
Juliane Henningsen taama nalunaareersorlu parteeqataa, Isak Hammond aqaguani tusagassiutinut allakkamini allappoq, illoqarfiit tamarmik aallartitaqartariaqanngitsut taamaattarnerlu atorunnaarsinneqartariaqartoq allalluni.
Inatsisartuni ippassaq oqallinnermi, Isak Hammond ersarissumik partiini sinnerlugu oqaaseqanngilaq.
- Inuit Ataqatigiit Inatsisartuni ilaasortaasut iluanni isummat assigiinngitsuunerat qularutigineqassanngilaq aamma kommunalbestyrelseni isummat assigiinngitsuupput. Tassalu maanna kommunalbestyrelsemi ilaasortat isumaat paaserusuppagut aammami taakku tunuliaqutsiisutut misiginissaat pingaartikkatsigu. Tassalu inatsisip nutarterneqarnissaanut kommunalbestyrelsemi ilaasortaat isumaat tusarniarparput.
Inuit Ataqatigiit Inatsisartunut ilaasortaatitaa, Isak Hammond oqarpoq.
Naalakkersuisut siunnersuutaat aappassaaneerlugu ukiamut oqallisigineqassaaq.
Sumiiffiit tamarluinnarmik kommunalbestyrelseni ilaasortaatitaqartarnissaat Atassutip aamma Kattusseqatigiit Partiiannit isumaqatigineqarpoq.
