Oqaluttuarisaanermut ilanngunneq pinnattaassanit pingaartinneqarnerusartoq
Ukioq Avannaata Qimussersuani ajugaasoq 30.000 koruunik akissarsitinneqarpoq, kiisalu aallaammik angalanissamullu 10.000 koruunit nalinganut tunineqarluni.
Avannaata Qimussersuani pinnattaassat piumaneqarnerpaaneq ajortut amerlanerpaariarluni ajungaasimasup nassuerutigaa.
- 1-unissamut immaqa piumaneqarnerpaasarpoq ajugaanissaq. Immaqa taanna ataqqinaammik isumaqarpoq. Taanna piumaneqarnerpaajusarpoq, Jørgen Kristensen tallimariarluni ajugaanikoq oqarpoq.
Taanna Kalaallit Nunaanni Qimussertartut Kattuffianni ukiuni 17-ini ataannartumik siulittaasuusimasumit ilalerneqarpoq.
-Tupinnanngitsumik ajugaarusussuseq imminermini tassaavoq aamma inummut, qimussimullu, ataqqinaat. Aammalu taassuma saniatigut oqaluttuarisaanermut ilanngunnermik malitsilik, Mikkel Jeremiassen oqarpoq.
AAMMA ATUARUK Avannaata Qimussersuani pissartaajunnaarsinneqartoq
Ukioq Avannaata Qimussersuartoqarnerani pisut nalinginnaanngitsut arlaqarput.
Ajugaasup kaajallaffissaq angusimanngimmagu kingullinngortinneqarpoq. Qimussersuariap qimmia teriarsuarnut toqoraatinik nerisinneqarsimasimasinnaanera inerniliunneqarpoq, unammeqataasullu ilaata qimmii orsutortinneqarsimallutik.
Unammeqataasut qimmiinik ajortumeerineq nutaarsiassaanngilaq. Unamminissaq sioqqullugu qimmimi luftpistolimik seqqortaarneqarnerat, Jørgen Kristensenip unammisartuugallarami misigisaasa ilagaat, taamaammat qimmit nakkutilliisoqartarnissaat siunnersuutigaa.
- Inatsisilioraluaraanniluunniit nakkutiginnittoqanngippat taamaliortoqartuassagami, Jørgen Kristensen oqarpoq.
AAMMA ATUARUK Qimmeq qimuttoq toqunartutortinneqarluni toqusoq
Avannaata Qimussersuani aallarniisut ilaata pisut akuersaarsinnaanngilluinnarpai, allarluinnarmimmi siunertaqarlutik 1989-imi siullermeerlutik Avannaata Qimussersua aallartippaat.
- Inuinukua nuannaartinniarsaralugit aammalu qimminnguaminnik paarsilluarnerulernissaat siunertaralugu aallarniigaluartugut, Ole Qvist taama oqarpoq.
Avannaata Qimussersua aappaagu Uummannami ingerlanneqassaaq.