'Oqalugiallammak'-mik Danmarkimi nersornaasiigassatut innersuussap nunarput nittarsaalluaraa
18-inik ukiulik Aviaya Andersen oqalugiaraangami tiguaallaqqissuuvoq.
Taamaammat atugarliortutut imerajuttutullu allamiunit tusaamanerlunneqartinninngarnit tamatigoortuunerunerput oqalugiarami erseqqissarniarsaraa. Allamiunimmi nunarput pillugu oqaloqateqartilluni kalaallit pillguit pigiuliutiinnakkanik isumaqartortalikkajupput.
- Nunatsinni atugarliortortaqarnerput imigassamillu ajornartorsiutilittortaqarnerput miserratiginngilara, tusaamanerlunneqarnitsinninngarnilli tamatigoortuunerunerput takutikkusullugulu oqaluttuarerusuppara. Inuusuttavut aamma ilinniagalittortaliusut sunniuteqarluartortaliusullu, taanna oqarpoq.
Nunatta alianaatsortai, nuannersortai qanorlu siuarsimatiginera ukkataralugit oqalugiarami ilisimagisaminit tiguaalluarsimanini tupaallaatigisimagini, taanna oqarpoq.
- Oqalugiaatiga isornartorsiorneqangaatsiassasorigaluarakku, tusarnaartulli ilimagisanniit tiguartilluarnerupput, taanna oqarpoq.
Tamannalu tassa oqalugiallammammik Danmarkimi nersornaasiinissamut innersuunneqarneranik kinguneqarpoq. Danmarkimi suliffeqarfik imminut ingerlattoq siullerpaamillu nersornaasiissussanngortoq Danske Taler inuusuttunut sunniuteqarluartunut oqalugiallammannut nersornaasisassaaq.
Nunarput nittarsaakkaa
Oqalugiarneq silattuussarinngikkaluarlugu nuannareqigini nunarpullu pillugu isummat pigiliutiinnakkat pinnagit nuannersortaali pillugit oqalugiartarusulluni, Aviaya Andersen oqarpoq.
- Soqutiginnilersitsinissaq nuannareqaara, taamaammat nunatsinnik nittarsaassilluarnera attakkusuppara.
Nersornaasiinissamullu innersuunneqarnini taamaaliornissaanut ammaassisoorpiaasoq, taassuma oqaatigaa.
- Nunattami nittarsaalluarnissaanik maanna periarfissaqarnerulerpunga, aamma kalaaleqativut Danmarkimiittut uattulli misigisaqakkajuttut pillugit oqaaseqartarnissannut, taanna oqarpoq.
