Oqaluffiup tusarnaartitsinernut atorneqarnerulernissaa kissaatigigaa
Oqaluffinni amerlanerusunik aaqqissuussaanerusunillu tusarnaartitsisoqartalissaaq.
- Kiisami taamaattoqalerpoq, nuanneq, eqqumiitsuliortoq Rasmus Lyberth oqarpoq.
- Oqaluffimmiikkaanni nipaarsaarralluta misigissutsit takutinnaveersaarlugit quersorralluta, quersornerujussuaq, meeqqat qiarpalaartut oqartoqassananilu. Naamik, oqaluffik nuannaarfissaruna. Ammarfissaq, eqqumiitsuliortoq Rasmus Lyberth oqarpoq.
AAMMA ATUARUK Inuiattut ullorsiornitsinni operamik erinarsortoqartoq
Taamaaliornikkummi assigiinngitsorpassuarnik angusaqartoqarsinnaasoq, nipilersortartup oqaatigaa:
- Illoqarfiit nunaqarfiillu tamarmik oqaluffeqarput ilaanni sapaatiinnakkut atortakkagut, kisianni atortalerutsigit nuannaarfigalugit, oqaloqatigiiffigalugit, oqalugiarfigalugit sorpassuarnut atorutsigit tassa aatsaat nuannersumut isissaagut, Rasmus Lyberth oqarpoq.
Oqaluffimmi tassaavoq:- Nuannaarfissaq, aliasuffissaq, anersaakkut nuannersunik iluaqutaasinnaasunik aallerfissaq, isumaqarpunga oqaluffik taamatut atorneqaleruni nuannaartitsilissaaq, nuannaartitsisaqisoq nalunngilara, kisianni nuannaartitsilissaaq suli annertunerujussuarmik,
AAMMA ATUARUK Tønder Festivalip nunap inoqqaavi immikkut sammigai
Nuummi ilagiit sinniisaat tamanna isumaqatigaat. Sinniisummi oqaluffiup pisoqarfiunerunissaa anguniarlugu assigiinngitsunik suliniuteqarput:
- Massakkut eqqartuleqqavarput inuusuttut, inuusunnerit målgruppeliullugillusooq tusarnaartinneqarsinnaanerat. Taanna iluatsissagutsigu assigiinngitsunik qulequtalersorlugu, ukioqatigiikkaalersorlugu arlaatigut oqaluffiup ornigarneqarnerulaarnissaa aamma eqqarsaatigalugu, Nuummi ilagiit sinniisaanni siulittaasoq Leif Saandvig Immanuelsen oqarpoq.
