Oqaloqatigeeqqaarnissaq naatsorsuutigisimagaluarpaa

Martha Lund Olsen naalakkersuuffimminit ippassaq tunuartinneqarpoq. Tunuartitsinissamulli aalajangiisoqartinnagu oqaloqatigeeqqaarnissaq taassuma naatsorsuutigisimagaluarpaa. Naalakkersuisuujunnaartoq Qanoruumut tallimanngormat taama oqarpoq.
Assi © : Namminersorlutik Oqartussat
januaarip 28-at 2017 16:33

Naalakkersuisunut siulittaasoq Kim Kielsen tallimanngornermi ualikkut tusagassiortunik katersuutsitsivoq. Tassanilu oqaatigaa, naalakkersuisoq Martha Lund Olsen kommuninut qinersinissamut aprilimi sassarniarniarnera peqqutigalugu naalakkersuisuuffianit tunuartillugu.

AAMMA ATUARUK Martha Lund Olsen Naalakkersuisuujunnaarpoq

- Naatsorsuutigigaluarpara annertunerusumik itinerusumillu eqqartussallutigu tamanna; periarfissaq qanoq ippat, partiimut suna pitsaanerua, qanoq iliorutta pitsaanerussava. Kisianni paasivara tamakkiisumik naalakkersuisutut isigineqarsinnaanngitsunga kommunalbestyrelsimut qineqqusaarnissara taanikuugakku, Martha Lund Olsen oqarpoq.

Martha Lund Olsen aprilimi kommuninut qinersinissamut Kommuneqarfik Sermersuumut sassarnissaminik pilersaaruteqarpoq, borgmesterinngorniarnissanili oqaatigiumanngilaa.

AAMMA ATUARUK IA-mioq paarlaavoq

 

- Isumaqarpunga partiit tamarmik anguniartuartaraat aamma anguniassagaat. Imaanngitsoq uanga kisianni neriuppunga Siumut Kommuneqarfik Sermersuumi borgmesterinngortitsiumaartoq.

Aatsitassanut Ikummatissanullu naalakkersuisup Inuit Ataqatigiinneersup Múte Borup Egedep Martha Lund Olsenip suliassaqarfii naalakkersuisuuffigigallassavai.

AAMMA ATUARUK Kielsenip Martha Lund Olsen tusagassiortunik katersuutsitsinermi inuulluaqquaa