Oqaatsit piunnaarlugit silassorissuseq naapertorlugu sulisussarsiortoqarli
Inatsisartut oqaluttarfiannit kalaallisuinnaq Partii Inuit oqaloqqusillutik oqaaseqaataat qinersisoqannginnerani imminut appisaluuttaqattaannermik pilersitsivoq. Partiip nutaap isummani ersarissarpaa, nunattali siunissaa pillugu oqallinneq pillukartippaa. Naaja Nathanielsenip oqallinneq taanna utertikkusuppaa. Allaffeqarfissuup taassumalu aaqqissuussaanerata eqqartorneqarnissaat siunnersuutigaa. Kalaallit Nunaatami ilusiliaq nunatsinnut immikkut naleqqussagaanngitsoq tiguinnarsimavaa.
-Siunissami sulisussarsiorniaraangatta immikkoortut sisamat aallaavigalugit sulisunik toqqaasarnissarput siunnersuutigaara. Allaanerusumik eqqarsartariaqarpugut, piginnaasanilinnik inerisaaffissanik pilersitsissaagut, ilisimasat pigeriikkat attatiinnarniassavagut kiisalu nunarsuarmut siaruarneq atorluassavarput. Taamaaliornikkut nunaqqativut peqataanerulersinniarlugit ilinniartissavagut, taamaalioruttami piffissaq ungasinnerusoq eqqarsaatigalugu allamiunik ikinnerusunik pisariaqartitsilissagatta, Naaja Nathanielsen oqarpoq.
Inuussutissarsiutinik inerisaaneq iluatsinngikkutsigu nunatsinni sulisoqarnikkut annertuupilussuarmik allanngortoqarneranik kinguneqassaaq. Inuit piginnaanillit atorfinnut pilerinarnerusunut akissarsiagissaarfiusunullu nussulissapput. Taamaaliornikkullu ullumikkornit sulisussarsiniornikkut suli annerusumik ajornartorsiuteqalissaagut, pisortat suliffeqarfippassuillu sulisussarsiorneq ajornartorsiutigalissallugu. Taamaammat maannangaaq siunissaq eqqarsaatigilereertariaqarparput.
- Suliatigut killigitinneqartut qeratasuut attatiinnarniarnissaanut nunarput mikivallaaqaaq. Pitsaassutsip appartinnissaanik siunertaqanngilanga. Pigisavulli aallaavigalugit suli annerusumik naleqqussarsinnaasariaqarpugut. Kalaallit kinguaariit aggersut sulisorisinnaasaannik aaqqissuussaasumik toqqartuissaagut, ilinniartitseqqiilluta ilinniartitsillutalu. Aamma naatsorsuutigisamik ileqquusimillu ilinniakkatigut tunuliaqutaqannginnerat aallaqqaataanit apeqqutaatittariaqanngilarput. Ilisimasat pigeriikkavut suna tamaat sakkugalugu attatiinnarniartariaqarpagut, tamannalu sulisut misilittagartuut suleqatiminnut inuusunnerusunut ilisimasaminnik ingerlatitseqqiinerisigut pitsaanerpaamik angusinnaavarput, taamaaliornikkullu sulisoq kingusinnerusukkut suliffini qimappagu ilisimasat attatiinnarsinnaassallutigit. Kiisalu aamma teknologi nalitsinni atugarput atorluartariaqarparput. Sulisut tamarmik allaffimmi issiasariaqanngillat, aamma nunatsinni sumiiffini allaniissinnaapput allaallumi nunami allami, Naaja Nathanielsen oqarpoq.