Assi: KNR

Operamik erinarsortartoq Ida Heinrich eqqissivoq

Ida Heinrich ullumi eqqissivoq.

Kalaaleq operamik erinarsortartoq eqqissivoq.

Ida Heinrich nappaassuarmik kræftimik nappaateqartoq 2016-imi paasineqarpoq, operamik erinarsortartoq ullumi eqqissisoq, tusarfiup ilaqutariinnut qanigisaasup KNR-imut uppernarsarpaa.

Ida Heinrich 1979-imi inunngorpoq tassungalu Facebookimi eqqaaniutit takkussuupput - kultureqarnermut naalakkersuisuusimasoq, Doris Jakobsen Jensen ima allagaqarpoq:

"Alianaqaaq taama qimagutiaartigingavit. Arnaavutit nukittooq, maligassiuisoq, asanninnerinnaq minnerunngitsumillu qinngornilimmik asannittoq. Inuiaqatigiit imaannaanngitsumik annaasaqarpugut, maqaasissaqaatsigit uummatitsinniittuassaatillu. Tunniussarpassuatit erinannguillu tusarneqisoq qaqugorsuarmut kinguaatsinnut ingerlaqqittuarumaarpoq. Ilaquttatit, qanigisatit minnerunngitsumillu qitornannguatit misiginneqatigingaarpagut. Tamanut qujanaq. Eqqaaneqarnerit ataqqinartuuli."

Kulturikkut siorna nersornaaserneqartoq

Ida Heinrich Kulturikkut nersornaasiuttakkamik siorna inuiattut ullorsiornermi nersornaaserneqarpoq. 

Ilinniartitaanermut, Kultureqarnermut Ilageeqarnermullu Naalakkersuisoq nersornaasiinermut atatillugu Ida Heinrichimut ima oqaaseqarpoq:

 Klassiskimik ilinniagaqarnini tunuliaqutigalugu nunatsinni erinarsornikkut kulturitta nutarteriffigineqarnera ineriartortinneqarneralu peqataaffigisimavaa. Inuit amerlasuut erinarsornermigut tuppallersarlugillu qiimmassartarpai. Tamatsinnullu ersarippoq erinarsorneq inuunermini ilisarnaataasa ilagilluinnaraat. Amerlasuunut maligassiuisuuvoq nunatsinnilu inuianni klassiskiusumik nipilersoriaatsimi sallersaalluni. 

Nipilersortartut qassiiusut Ida Heinrichimut 2017-imi katersuinissipput. Tamanna Nuummi pivoq, katersiuiniussinerlu Ida Heinrichip nuannaarutigaa.

- Tuppallernartorujussuuvoq nuanneqaarlu taamatut aaqqissuisoqarsinnaammat, Operamik erinarsortartoq, KNR-imut septembarip aallaqqaataat 2017-imi oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat