Danmarkimi politikerit: Kalaallit politikeriisa nunartik ilisimaarineruaat
![](/sites/default/files/styles/image_934x467/public/article_images/49199983_2278431619037930_1270268583888289792_n.jpg?itok=OTUVOjUn)
Danmarkimi naalagaaffiup nunatsinni suli akisussaaffigisai 30-upput.
Akisussaaffinnulli taakkununnga tunngasuni pisut kalaallit politikeriisa ilisimaarinerukkajuppaat.
Folketingip nunatsinnut ataatsimiititaliaata tamanna nassuerutigaa. Taamaammat Inatsisartut ataatsimiititaliaanni assigiinngitsuni siulittaasut allakkatigut ammasumik ataatsimeeqatiseraat.
Ataatsimiititaliap danskit akisussaaffiinut tunngasuni suleqatigiinnerunissaq allakkatigut siunnersuutigaa.
- Tamanna pillugu Nunanut Allanut Sillimaniarnermullu Ataatsimiititaliaq kisimi peqataatinneqassanngitsoq isumaqarpugut. Kalaallit Nunaat pillugu ataatsimiititaliami pingaartikkatsigu avitseqatigiinnissaq sammisanut arlaliusunut. Soorlu aamma inatsisartoqarnikkut attavigeqatigiinneq nunat tamalaat akornani nakussassartariaqarsorigipput, peqataatitsinikkut oqaloqatigiinnikkullu. Taamaammat kissaatigaarput annertunerusumik Inatsisartuni ataatsimiititalianik attuumassuteqartunik peqataatitsineq pilersinneqassasoq, ataatsimiititaliap allagaani allaqqavoq.
AAMMA ATUARUK Siumut Folketingimi: Nunarput nunanik allanik nammineq suleqateqarsinnaalersinneqarli
Folketingip nunatsinnut ataatsimiititaliaata siulittaasuata, Aki-Matilda Høegh-Dam Siumumeersup, allakkat aatsiugarai. Inatsisartut Folketingip nunatsinnut ataatsimiititaliaata Danmarkip nunatsinni akisussaaffigisaanik sammisaqarnerani peqataatinneqarnerulertariaqartut, taassuma taassumalu suleqataata, Aaja Chemnitz Larsenip IA-meersup taakkualu siuliisa uparuakkajuppaat.
Kalaallit Nunaata, Savalimmiut Danmarkillu Issittoq pillugu periusissiamut 2021-imi atuutilersussamut ilanngutassatut qulakkiigassat kingulliit oqallisigileruttorpaat.
Periusissiassarlu taanna pillugu nunani taakkunani ataatsimeeqatigeeqattaarnerni ataatsimik ersertoqartoq, Folketingip nunatsinnut ataatsimiititaliaata allagaani allaqqavoq:
- Issittoq pillugu periusissamik suliaqarnermi Inatsisartuni ilaasortat peqataatinneqarnerunissaat pissusissamisoortutut Kalaallit Nunaat pillugu ataatsimiitsitaliami isigaarput. Inuimmi issittumi inuusut Issittoq pillugu periusissamut pitsaanerpaamik paasisimasaqarfiginnittut ilisimasaqarfiginnittullu qularnanngilarmi.
Kalaallit danskillu politikerii coronavirusip ajornartoortitsinera peqqutigalugu attaveqaatit sapinngisamik atorlugit ataatsimiitassasut, ataatsimiititaliap siunnersuutigaa.