Ombudsmandip utoqqaat illuat isornartorsioraa

Luuvikasimmi sulisut najugaqartunut nangilersuinissaminnut, perusuersartitsinissaminnulluunniit periarfissaqarneq ajorput. Ombudsmandeqarfimmiit misissuiartortut utoqqaat illuanni Luuvikasimmi apriilimi misissuimmata, utoqqaat illuanni pisortaqatigiit sulisullu arlallit taama oqarput.
Luuvikasimmi sulisut najugaqartunut nangilersuinissaminnut, perusuersartitsinissaminnulluunniit periarfissaqarneq ajortut sulisut isumaqarput. Assi © : Ane-Marie Hansen/KNR
oktobarip 22-at 2019 09:14

Utoqqalilluni nammineerniarneq killeqaleraangat utoqqaallu illuannut nuukkaanni, sulisunit ikorfartorluarneqarnissaq kissaatigineqartarpoq.

Narsamili utoqqaat illuanni Luuvikasimmi najugalinnut tamanna ajornarsimavoq.

Utoqqaat illuannut pulaarsimasoq ombudsmandi taama isumaqarpoq.

Utoqqaat illuat Luutivikasik Kommune Kujallermit ingerlanneqarpoq. Ombudsmandilli utoqqaat illuanni pissutsit ajornartorsiutaasut arlallit isornartorsiorpai.

Sulisussaaleqinnginneq iluaqutaanngitsoq

Kommune Kujallermi isumaginninnermi ingerlatsinermut pisortaq Boris Klarsgaard naapertorlugu utoqqaat illuat sulisoqarniarnikkut ajornartorsiorfiunngilaq, nalunaarusilarlu naapertorlugu kommuni paaqqinnittarfiup sulisuisa tiimimusiassaannut 2 millionit koruuninik aningaasaliivoq.

Nalunaarusiami allaqqasut ilagaat utoqqaat illuanni najugaqartut siniffimmut qanittukkut quisoorsimasoq sulisut ikiuunnissaminnut periarfissaqanngimmata.

AAMMA ATUARUK Misissuineq nutaaq: Utoqqaat kiserliortut

Sulisut ilaasa oqarnera naapertorlugu. najugaqartut taamatut nalaataqartarput. Sulisut periarfissaqannginnerisa kingunerisaanik siniffimmut natermullu quisoortoqartarpoq, taamaattoqarsimatillugulu eqqiaanissamut periarfissaqartuaannanngilaq.

Nalunaarusiami Kommunip akissuteqaataani allaqqavoq, kommunip ajornartorsiutigisaraat piffissap ilaanni sulisut amigartarnerat ajornartorsiutaasarnera tamakkununnga peqqutaasartoq.

Nakorsaaneq ernumassutissaqanngitsoq

Utoqqaat illuanni najugaqartut ikiorluarneqarnissaat Kommune Kujalliup pingaartikkaa Boris Klarsgaard erseqqissaavoq.

- Narsami utoqqaat illuanni najugallit pisariaqartitaminnik ikiorneqarsinnaasarsimannginnerat ajuusaarutigaarput. Taamatulli nalaassisoqaqqinnginnissaa anguniarlugu iliuuseqassaagut, taanna oqarpoq.

Uninngasunut sullissinissamut periarfissaqartannginnerup saniatigut utoqqaat illuanni Luutivikasimi ilaatigut nangiit aamma amigaatigineqarsimapput.

Ombudsmandip ilisimatitsissutigaa aamma nakorsaaneqarfik utoqqaat illuannut 2019-imi pulaarsimasoq pisumik ilisimatinneqartoq.

Nakorsaaneq misissuinermi tassani nammineq takusani tunngavigalugit Luuvikasimmi paaqqutarinninneq illersorneqarsinnaanngitsutut isiginngikkini naliliivoq.