Ole Lynge kuultiusumik Nersornaaserneqarpoq
Inatsisartut Siulittaasuata Lars-Emil Johansenip Ole Lyngemut oqalugiaammini ilaatigut makku erseqqissaatigai.
1989-imi Aasianni kommunalbestyrelsimut qinigaavutit 2001-illu tungaanut ilaasortaallutit. 1989-imili, Inatsisartut danskisut Landstingemik taaguuteqarallarmata, Inatsisartunut aamma siullerpaamik ilaasortanngorputit, taamaalineranilu piffissap ingerlanerani arlaleriarlutit ilaasortaallutit.
Taamaalillutit nunatsinni Namminersornerunerup aallartilaarfiani nunatsinni naalakkersuinikkut ineriartortitseqataasimavutit, piffissarlu tamanna aamma pingaaruteqarpoq, tassami taamaalinerani Inatsisartut Naalakkersuisullu avissaartinneqarput nunatsinnilu innuttaasut oqartussaaqataaneranni susassaqarfiit aqqutit nutaat atorlugit ingerlanneqalerlutik.
Inatsisartut Siulittaasuata Lars-Emil Johansenip Inatsisartuni aamma siulittaasuusimasumut Ole Lyngemut oqalugiaammini ilaatigut taama tunngavilersuivoq.
