Ole Dorph: Qaasuitsup Kommunia sulisunik soraarsitsiortoqqissinnaavoq
Qaasuitsup Kommuniata borgmesteria, Ole Dorph taama siulittuivoq.
- Taama sakkortutigisumik toqqusassineqarnerput kinguneqartussaassooq, suut tamaasa mumerarlugit sipaarnissamik suliaqartussanngornissatsinnik. Ingerlatsinerlu eqqarsaatigalugu, kommunip sulisuisa amerlassusaannik ikililerinissaq avaqqukkuminaassaaq, Ole Dorph oqarpoq.
Kommunit aningaasatigut nalimmassarneqarnissaannik aaqqissuusseqqinermi, Qaasuitsup Kommunia 34 million koruuninik pissarsiaqartussaagaluarpoq. Tamannali ukioq manna pisussaajunnaarpoq, Inatsisartunut maanaannaq qinersisuqartussanngornera pissutigalugu.
Aamma atuaruk Naligiissaarigallarnissamik aaqqissuussineq taamaatiinnarneqarallarpoq
Aningaasat 34 million koruunit, Qaasuitsup Kommunianit ukioq mannamut naatsorsuutigineqarsimagaluartut karsimiittuutigilerneqarsinnaannginneri sutigut tamatigut ajornartorsiortitsilissasoq, borgmester Ole Dorphip oqaatigaa.
- Taamaattumik tamassuma kingunissai suliaralugit massakkut aallarteruttorpavut. Aappaagummullu missigersuutinik suliaqartut, tassa aningaasaqarnermut ataatsimiititaliaq allallut tamassumunnga attuumassuteqartunik suliaqartut, ullup ingerlanerani nalunaarfigineqartussaassapput sipaarniarnermik annertunerusumik suliaqartussanngussasut.
Qaasuitsup Kommuniani borgmesteri, Ole Dorph taama oqarpoq.