Naligiissaarigallarnissamik aaqqissuussineq taamaatiinnarneqarallarpoq
Qinersisoqartussanngornera patsisigalugu iliuuseqarfigineqanngikkallassaaq.
Naligiissaarinermut aaqqissuussinissami, ilaatigut akileraartarnermi inatsimmik allanngortitsinernik marlunnik tunngaveqarpoq, naatsorsuutigineqartutut maannakkut piviusunngortinneqarsinnaanngitsunik.
Taamaammat Aningaasaqarnermut Nunamullu Namminermut Naalakkersuisoqarfiup kommunit nalunaarfigai Naalakkersuisut inatsisit malillugit taamaallaat pisariaqartinneqarnerpaaginnarnik aalajangiisinnaammata, taamaalilluni nunarput unittoortinneqannginniassammat.
Tamatuma kinguneranik 2015-imut utaqqiisaagallartumik nutaamik naligiissaarinermut aaqqissuussinissat nutaat naammassineqarsinnaajunnaarput.
Taamaammat kommunit 2015-imut ataatsimoortumik tapiissutit, naligiissaarutit, inuit akileraarutaanneersuugallartut, ingerlatseqatigiiffiit akileraarutaat pissarsianillu akileraarutit malittarisassat isumaqatigiissutillu maannakkut atuuttut malillugit tigussavaat.
Tamatuma kinguneranik 2015-imut naligiissaarinermut aningaasat 2014-imut naligiissaarinermisulli tunngaveqarluni naatsorsorneqassammata. Taamatuttaaq 2015-imut ataatsimoortumik tapiissutit 2014-imut ataatsimoortumik tapiissutitut aningaasartaqassapput agguaanneqarlutillu.
Taamatut pisoqarpoq 2014-imut aningaasanut inatsit akuersissutigineqareersoq aamma 2015-imut Inatsisartut aningaasaliissutinut inatsisigigallagaat tunngavigalugit.
Paatsuungasoqaqqunagu malugeqquneqassaaq qinersinerup kingorna Nalaakkersuisunngortut ataatsimoortumik tapiissutinut naligiissaarinermullu ilusiliussassaasinnaasoq nutaaq pillugu kommuninik oqaloqateqarniarsinnaanissaat ilimagineqarsinnaammat.
