Oldboysit pissartanngorniuttarnerat pisortatigoortunngortoq
Nunatsinni oldboysit futsalimik pissartanngorniuttarnerat manna tikillugu pisortatigoornikuunngillat, taamaammallu klubbit unammigiartitsiniaraangamik pisortanit taperneqarsinnaasarnikuunngillat.
Maannali tamanna allanngorpoq.Tassami oldboysit futsalimik pissartanngorniuttarneri pisortatigoortumik pisalissasut Kalaallit Arsaattartut Kattuffianni, KAK-mi, siulersuisut aalajangerput.
Tamanna unammigiat angalanerminni pisortanit taperneqarsinnaalernissaannik siunertaqaannarani aamma oldboysit arsaannermik pimoorussisuunerannik nersorinninniarnerusoq KAK-mi siulittaasoq, John Thorsen, oqarpoq.
- Pissartanngorniuttarnerat siornatigut nuannaarniutaanerunikuuvoq, kingullertigulli pimoorunneqaleraluttuinnarnikuuvoq unammisartuniillu pingaartinneqaqaluni, KAK-p siulittaasua oqarpoq.
- Ullutsinni oldboysit timersortartuupput pimoorussisut, nukittullutillu arsalerillaqqissut, unammerusussuseqarluartullu. Pisortatigoortunngornera taakkununnga isumaqassaqaaq, aammami pisortatigoortumik ujamminnassinnaalissagamik, John Thorsen oqarpoq.
AAMMA ATUARUK Nunarput isikkamik arsaallaqqinnerpaanut unammisalersinnaasoq
Unammisartunut 35-leereersimasunut pisortatigoortumik pissartanngorniunneq siulleq Ilulissani apriilip 27-anit 29-anut pissaaq, 45-leereersimasunullu pissartanngorniunneq Maniitsumi maajip 18-ianit 20-at ilanngullugu pissalluni.
Pissartanngorniunnerit pisortatigoortuunissaannut ikinnerpaamik klubbit sisamat peqataanissaat piumasaqaataavoq.
Oldgirlsit pissartanngorniuttarnissaat aamma pisortatigoortunngorpoq, klubbilli ikinnerpaamik sisamat nalunaassanersut suli qularnartoq KAK-mit oqaatigineqarpoq. Iluatsissappat marsip aallartinnerani Nuummi pissaaq.
Silami arsaalluni pissartanngorniuttarneri pisortatigoortunngussanersut suli aalajangiunneqanngilaq.
