Nunarput isikkamik arsaallaqqinnerpaanut unammisalersinnaasoq
Innuttaasut politikerillu Nunatsinni isikkamik arsaannermut ineriartortitsilluarsinnaappata Nunarput ineriartortitseqqinnissamut 20-25 millionit koruuninik tunineqarsinnaassasoq, Jesper Møllerip nalilerpaa.
Suliaqarluartoqassappallu Nunarput Europamiut arsaattartut kattuffissuannut UEFA-mut ilaasortanngorsinnaavoq, nunallu tamalaat unammineannut peqataasarsinnaassalluni.
- Manchester United, Liverpool europami iligeerujussuit, nunanullu allanut unammisartut ukiut qulit qaangiuppata Kalaallit Nunaannukartalersinnaapput. Immitsinnulli tapersersoqatigiinnissarput pisariaqarpoq, Jesper Møller oqarpoq.
Aamma atuaruk DBU-p siulittaasua Nunatsinni arsartarnerup siuarsaaviginissaanut 20-25 millioninik aningaasassaqartitsisoq
Politikerit peqataasariaqartut
Meeqqalli isikkamik arsaannermut soqutigisallit kisimiillutik Nunatsinni arsaannermut ineriartortitsisinnaanngillat.
- Politikerit peqataanissaat aamma pisariaqarpoq. Kalaallit Nunaanni borgmesterit sisamat Naalakkersuisullu suliamut aningaasaliinermullu peqataanissaminnut akuersisariaqarput, Jesper Møller oqarpoq.
Naalakkersuisut kommunillu sisamat tapersersuissappata ukioq naangajallugu pissartanngorniuttoqartassaaq, arsaattartullu marloriaammik amerlanerulersinneqarniarsariaqassasut, Jesper Møller oqarpoq
- Arsaattarfeqartitsisinnaasoqarpat, meeraqarpat arsaakkusuvissunik, piginnaanilinnik ineriartortitsisoqarpat, dommerinik sungiusaasunillu ilinniartitsisoqarpat, isikkamik arsaanneq ineriartortinneqarpat taava suna tamaat anguneqarsinnaavoq, Jesper Møller oqarpoq.
Aamma atuaruk Ittoqqortoormiini ivigaasaaqqanik arsaattarfik pisortatigoortumik atoqqaartinneqartoq
Aamma UEFA-meersoq Allan Hansen timersorneq pillugu ataatsimiinnermi sisamanngornermi peqataassaaq, Nunatta UEFA-mut ilaasortanngorsinnaanermut periarfissai oqaluuserissallugit.
