DBU-p siulittaasua Nunatsinni arsartarnerup siuarsaaviginissaanut 20-25 millioninik aningaasassaqartitsisoq
Taassuma Nunatsinni isikkamik arsaattartunut nuannersumik nutaarsiassaateqarluni KNR-imut oqaatigaa. Aningaasaateqarfiit assigiinngitsut Nunatsinni isikkamik arsaattarnerup ineriartortinneqarnissaanut 20-25 millionit koruunit missaannik aningaasaliisimapput.
- Aningaasat taakku Kalaallit Nunaanni isikkamik arsaattarnerup malunnaatilimmik siuarsarneqarnissaanut DBU-p GBU-llu suleqatigiinnissamik isumaqatigiissutaata timitalersornissaanut atorneqassapput, siulittaasoq oqarpoq.
Aningaasat milliornerpassuit atorlugit Nunatsinni isikkamik arsaattarnerup siuarsarneqarneratigut Nunatsinni pikkorissorpassuit suli pikkorinnerulersinnissaat takorluugaavoq.
- Meeqqanik arsaannermik nuannarisalinnik toqqammaveqassaaq, maanimi isikkamik arsaanneq nuannarineqartupilussuuvoq. Pikkorissunik sungiusaasoqarlutillu pikkorissunik aqutsisoqassapput. Pingaarnertullu, arsaattarfiit pitsaanerusut pisariaqartippaat.
DBU-meersoq Jesper Møller Nunatsinni arsaattartut kattuffiannut ukiut marluk matuma siorna tikeraarpoq, arsaattarnerullu ineriartorteqqinnissaanut arsaattarfinnik malunnaatilimmik pitsanngorsaasoqartariaqarnera tikeraarnermini paasisaasa ilagaat.
- Kalaallit Nunaanni meeqqat taama pitsaanngitsigisunik arsaattarfeqartissinnaanngilagut. Ivigaasaaqqanik arsaattarfiit ikitsuinnaarput - amerlanerit sioraapput - tamannalu pinngitsoorata iliuuseqarfigisariaqarparput. Tamannalu uanga DBU-llu suliniuteqarnitsinni anguniagaraarput. Aningaasaateqarfiit attaveqarfigisatta aningaasanik tunniussaat kommunini sisamaasuni ivigaasaaqqanik arsaattarfinnik 4-6-inik pilersitsinissamut atorneqassapput, DBU-p siulittaasua Jesper Møller oqarpoq, Danmarkillu Nunattalu nunani tamalaani pissartanngorniunnernut anngunniunnerni ukiualuit qaangiuppata unammisalernissaat aamma neriuutigalugu.
Timersorneq pillugu ataatsimeersuartoqarnerani ullumikkut saqqummiisussaq alla tassaavoq Europami arsaattartut kattuffissuannit UEFA-meersoq Allan Hansen, taannalu Nunatta UEFA-mut ilaasortanngornissaanut periarfissat pillugit saqqummiissaaq.
