OL-mut sinnattoq ajaluvoq, qamiviganili: Nuunu Chemnitz Berthelsen annertuumik ajoquserpoq
Iluatsilivikkaluaq iluatsinngitsoortoq.
Pissutsit ilungersunartut taamaapput sangusaartartumut 25-nik ukiulimmut Nuunu Chemnitz Berthelsenimut Nuummeersumut ukiortaaq sioqqutilaarlugu OL-mut annguteriaannartut inissisimagaluartumut.
- OL-mut angunnissaq neriuutigalugu Italiami unammeqataaqqammerpunga. Orluvunga seeqqukkullu ajoquserlunga. Suliaritereerpunga maannali qaammatini arfinilinni Nuummi nukittorseqqittussanngorlunga, Nuunu Chemnitz Berthelsen KNR-mut oqaluttuarpoq.
Allatut oqaatigalugu maanna OL-qarnissaanut Nuunu Chemnitz Berthelsen peqataasinnaajunnaarpoq.
AAMMA ATUARUK Nuunu VM-imi normu 62-inngortoq
Nuunu Chemnitz Berthelsen maanna ukiuni arlalinni nunani allani najugaqarpoq sisoqqarissiartornissaq siunertaralugu. OL-mullu anngunnissamut piumasaqaatit naammassiliivillugit qanittumi Italiami ajutoorpoq.
- Uggornarpoq ajorlunilu. Sivisoorujussuarmik taanna sinnattoriuaannarnikuuara sukataarlungalu sinnattora piviusunngortinniarsaralugu, Nuunu Chemnitz Berthelsen oqarpoq.
- Sinnattorami iluatsingajaavikkaluarpoq. Taamaattuumik assut uggornarpoq, kisianni timersorneq ajoraluartumik aamma taamaassinnaasarpoq, sisoqqarissoq oqarpoq.
Beijingimi ukiuunerani OL-qarnerani ikumatitaq februaarip sisamat ikinnneqassaaq ukiuuneranilu OL tulleq ukiut sisamat qaangiuppata Norgemi pissaaq.
- Suli inuusuppunga 25-iinnarnillu ukioqarama suli ingerlaqqinnissannut piumassuseqarpunga. Nalunngilara aamma ukiuni tulliuttuni sukkatsikkaluttuinnartussaallunga sangusaarnerlu nuannarisorujussuuara, Nuunu Chemnitz Berthelsen oqarpoq.
Maanna ilaquttaminut Nuummut angerlarluni ingerlaarpoq qaammatillu tulliuttut ajoqusersimanerminiit tassani iluarsiniassalluni ajoquserneralu tassa piffissamik eqquinerlungaatsiarpoq.