OL-imut peqataasimasut: Ukallip uummammi tillerulunnissaa ilimagissavaa

Tallimanngormat ukiuunerani OL aallartinneqarpoq pisarneq malillugu ammaanersiornermik. Dannebrog siulliutillugu isaasut, Kunngeqarfimmik Danmarkimik sinniisut  Beijingimi timersortarfipiluunersuarmut isaasut   aatsaat tamaa amerlatigaat.

Timesortartut 62-it Danmark sinnerlugu peqataasut ilaat ataaseq Kalaallit Nunaanniit immikkut ittumik annertuumik maluginiarneqarpoq – sisorarluni ooqattasartartoq kalaaleq Ukaleq Slettemark.

Sisorarluni ooqattaasartartoq 20-nik ukiulik ukiukkut olympiadeqarnerani kperngarluni ilaavoq, kisianni ukiukkut OL-eqarnermi kalaallinit peqataasunit siullersaanngilaq.

AAMMA ATUARUK Ukaleq Slettemark ukiuunerani OL-eqarnissamut peqataasussaanngorpoq

Tassami Ukaleq Slettemark kalaallinik sisorartartunik allanik malinnippoq. 

KNR-ip taakkunannga marluk oqaluuppai, sisoraatinik ujakkaartartut Martin Møller aamma Michael Binzer, uani OL-imi misigisaminnik oqaluttuartut.

Nunani sinnerlugu peqataanermini uummataa tilleruluttoq

Michael Binzer Kalaallit Nunaat sinnerlugu pingasoriarluni ukiuunerani OL-imut peqataavoq. Siullermik ukiut 30-rpiaat qaangiummata 1992-imi Frankrigimi. Siullerlu puigorsinnaanngisaannarpaa:

- Albertville-mi isaanermi qiiaammernera eqqaamavara. Sequnngeraangama isigisarpara, Michael Binzer oqarpoq.

Naak maani Kalaallit Nunaanni ukiukkut timersuutinik ingerlatsinissamut periarfissat naleqanngilluinnaraluartut, nunap inukinnera pissutigalugu olympiadeqarnermut atatillugu Kalaallit Nunaat mikisuararsuuvoq. 

Taamaattumik peqataasutut kalaallisut inuiaqatigiit neriuutaat nammanneqartarput. Tamatuma misigissutsinik Michael Binzer eqqasaqalersittarpaa: 

- Tassami nunani sinnerlugu peqataaneq tulluusimaarnaqaaq. Eqqaagaangakku uummatiga tillerululersarpoq. Aamma Ukaleq taamaassangatippara neriuutigalugulu.

1992-ip saniatigut Michael Binzer aamma ukiuunerani olympiademut ilaavoq 1994-imi Lillehammerimi  aamma 1998-imi Nagano-mi, tassami taamani Danmark manna tikillugu ukiuunerani OL-ernermi saqqarmiutuani pivaa, tassa curling-imi sølvinnakkami.

Timersortartut kalaallit dasnkit erfalasuata ataaniipput, nunat assigiinngitsut akornanni Olympiske Komité-p, IOC, Kalaallit Nunaat olympiademut atatillugu nunatut namminersortutut akuerinngimmagu.

Foto: Michael Binzer ujakkaartoq qimmini Kuluk ilagalugu.

Unammisartuunermi misigisat qaffasinnersaat 

Martin Møller ukiuunerani OL-imut 2014-imi aamma 2018-imi peqataavoq.

Aamma tassunga OL-imut peqataaneq misigisaavoq annertoorsuaq, tassanilu timersortartutut angusani annerpaat anguai. Pingaartumik 2014-imi Sotjimi kingullerpaamik unammeqataanini eqqaamavaa normu 45-nngorami sukuutsertuusaarluni 50 kilometerernermi.

- Taamani aatsaat taama sungiusarluarsimatigaanga. 2014-imi unammineq kingulleq immaqa inuutillunga arpannerma pitsaanersaraat. Tassani sivisuumik normu et-imit sekuntinik 10-innarnik kingulliuvunga. Mkisigisaq annertoorsuuvoq, Martin Møller oqarpoq.

Michael Binzeritulli misigisimavaa Kalaallit Nunaat sinnerlugu nunarsuami timersornikkut pisut annerpaartaasa ilaannut ilaalluni. Immaqa ilaannut tatisinerujussuartut misiginassagaluartoq Martin Møllerip akerlerluinnaanik misigivaa:

- Nunamit inukitsunnguamit pigaanni ilimagisat annertuallaanngillat. Kisianni sapiingisannguani tamaat iliortariaqarpoq. Soorunami saqqarmiortaarniarlutik unammisut usorineqarsinnaapput, kisianni aamma ilimagineqarnani ilaalluni nuanneqaaq.

OL allanut naleqqiunneqarsinnanngilaq 

Martin Møller aamma Michael Binzer ukiuunerani OL-ernerni ukiuni qulikkaartuni marlunni eqqaamasaminnik qiviaraangata annertuumik assigiissutsit takuneqarsinnaapput. 

Pingaartumik unammiuaarnerit saniatigut inuuneq eqqaamanartutut misigaat: 

- Timersoriaatsit assigiinngitsorpassuit katersuupput. Ullaakkorsioraanni timersortartut assigiinngitsorpassuit katersuussimasut naapitassaasarput. Soorlu ilaanni ishockey-rtartut nereqatigeriataarneqarsinnaapput, anillunilu curlingertut sisuupiloortullu takusarlugit. OL immikkut ittumik tammaarsimaarnertut misigisaqarfiuvoq. Misigisat taamaattut allakkut misigisaqartitsisinnaanngillat, Michael Binzer oqarpoq. 

Ukaleq pissanngatigalugu malinnaaffigineqarpoq 

Naak Michael Binzer imaluunniit Martin Møller ukioq manna OL-imi peqataassanngikkaluartut Kalaallit Nunaata olympiademi neriuutituaat qilanaaralugu malinnaaffigissagaat qularnanngilaq– Ukaleq Slettemark.

- Tatineqarnani unammisinnaavoq ajugaassangatitanut ilaannginnami. Sapinngisani atorlugu peqataanissaq kisiat eqqarsaatigissavaa, Martin Møller oqarpoq.

Aqagu Ukaleq Slettemark Kinami sisorarfimmut aallaasini tunuminiitillugu aallarpat Michael Binzer Nuummi angerlarsimaffimminit malinnaaniarpoq. Aamma tassunga angusaa pingaarpallaanngilaq.   

- Kalaallit Nunaannut sinnissutut naleqanngilaq, taamaattumik ilaanera tulluusimaarutigeqaara.. 

Ukaleq Slettemark OL-imi malinnaaffigerusukkukku unammineri KNR-TV-mi malinnaafigisinnaavatit.

Unammineq siulleq ataasinngorpat nalunaaqutaq: 05.40 pissaaq, KNR 2-milu malinnaavigineqarsinnaavoq.