Wuhanimi ilaqutariit coronamut annaasaqarsimasut oqartussat eqqartuussivilersuunniaraat
Kinami illoqarfissuarmi Wuhanimi oqartussat coronavirusip tuniluutilertorsinnaaneranik innuttaasunut mianersoqqussuteqarsimannginnerat innuttaasut quarsaarutigaat, allaallumi oqartussat eqqartuussivitsigut malersornialerlugit. Nappaatip tuniluutilersinnaanera ukiortaanngunngitsorli mianersoqqussutigineqarsimasariaqaraluartoq innuttaasut ilaat isumaqarput.
Virusip navianartuunera Wuhanimi nunallu immikkoortuani Hubeiimi oqartussat innuttaasunut isertuunniarsimagaluaraat, ilaqutariit assigiinngitsut oqaatigaat. Virusip navianartuuneranik mianersoqqussuteqartoqannginnera pissutaalluni virusi aqunneqarsinnaanngitsumik tuniluutilertulersinnaasimavoq.
AAMMA ATUARUK Kinap coronavirusimut suliniuteqarnermut ajornartorsiorsimanini nassuerutigigaa
Soraarnerup Zhong Hannengip ernini coronavirusimik tunillanneqareernerani februaarimi annaavaa, Hannengillu ilaqutariit allat, ilaquttaminnik aamma annaasaqarsimasut peqatigalugit nunap immikkoortuani oqartussanik eqqartuussivilersuussisinnaanissartik maanna utaqqivaat.
Wuhanimi oqartussat ernerata toquneranut pissutaasut, Hanneng oqarpoq.
Eqqartuussivilersuussinerit ikinnerpaamik tallimat Wuhanimi eqqartuussivimmi suliassanngortinneqarsimapput. Zhang Hai taama oqarpoq. Taassuma angunni coronavirusimut annaavaa.
Zhang Hai, eqqartuussivilersuussisut oqaaseqartartuattut isigineqarpoq, tamarmillu immikkut 1,9 millionit koruuninik taarsiivigineqarnissartik piumasarivaat, utoqqatsertoqarnissaalu aamma kissaatigalugu.
