SEAHAWK Qulimiguullit nutaat ornigukkasuarsinnaassusiat killeqartoq

Illersornissaqarfik Atlantikup avannaani qulimiguulinnut maanna atorneqartunut nutaanullu inuttassanik amigaateqarpoq. Taamaammat ornigukkasuarsinnaassusiat innarlerneqaqqavoq. Naalagaaffiup kukkunersiuisuisa naalagaaffiup 2017-imut naatsorsuutai pillugu nalunaarusiaani allaaserisaq, nittartakkap Altinget.dk-p naammattoorpaa.
Assi © : VFK
Allattoq Anton Gundersen Lihn
aggustip 24-at 2018 11:22
Nutserisoq Mads Lynge

Illersornissaqarfik qulimiguulinnik LYNX-it atorunnariartorlugit SEAHAWK-inik atuiartuaarnera ajornartorsiuteqalerpoq.

Qulimiguulinnut marlunnut assigiinngitsunut sungiusartitsisoqartarmat  qulimguullit nutaat ilinnarsimasunilk naammattunik inuttassaqarsimanngillat, ilutigisaanillu qulimiguullit pisoqqat atorneerukkiartorlutik.

Illersornissaqarfiup Issittumi suliassani taamaammat annikillisaavigisariaqarsimavai, Atlantikup avannaani umiarsuaatimini ataasiinnarmik qulimigooqarsinnaalerluni, siornatigut marluusimagaluartut.

AAMMA ATUARUK Seahawkimi timmisartortartup qulimiguulinni nutaani sillimaniarneq toqqissisimanartikkaa

Naak Illersornissaqarfik Issittumi suliassanik ikilisaagaluartoq, suliassani 2016-imi 2017-imilu naammassisinnaasimanngilai. Qulimiguullip ajunaalernermik kalerriisoqarneranit nunatsinni umiarsuarmit akunnerup ataatsip iluani apuussinnaanissaa naammassisinnaasimanagu, Illersornissaqarfiup nalunaarutigaa. Qulimiguulinnik pilersaarutaasumik aserfallatsaaliuinerit, arlaatigulluunniit ajornartoornerit matumani pissutaasut Illersornissaqarfiup nalunaarutigaa.

Qulimiguullit nunatsinni 2016-imi ullut 65-it atorneqarsinnaasimanngillat, 2017-imilu ulluni 54-ini. Illersornissaqarfiup imaani ujaasinermi annaassiniarnermilu peqataasinnaassusianik tamanna eqquivoq.

Illersornissaqarfik qulimiguulinnut nutaanut ilinniarsimasunik naammattunik inuttassaqanngitsoq, Naalagaaffiup kukkunersiuisuisa nalilerpaat, taamanlillunilu suliassanik naammassinnissinnaassusia killeqartoq.

Illersornissaqarfillu qulimiguullit nutaat tamakkiisumik atorsinnaanngikkaat aamma inerniliunneqarpoq.

AAMMA ATUARUK James Bondip qulimiguuliata alakkarnera

Illersornissaqarfiup qulimiguullit atorlugit Issittumi suliani aatsaat 2020-mi tamakkiisumik naammassisinnaassallugit naatsorsuutigaa.

Qulimiguullit SEAHAWK-it illersornissaqarfiup umiarsuai ikiorlugit suliassaraat oqartussaaffiginninnermik takutitsineq, ujaasinerit, imartami annaassiniarnerit nunallu tamalaat suleqatigiillutik iliuusaannut.

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk