Ny Kaledoniami eqqissiviillioqqilersut

Manerassuarmi qeqertarpaat ilaanni Ny Kaledoniami taasisinnaatitaanermik aaqqissuusseqqilersaartoqarnera pissutigalugu eqqissiviillioqqilerput. Aaqqissuusseqqinneq Frankrigimeersut qeqertarpannut nunasisut nunap inoqqaavininngarnit pissaaneqarnerulernerannik kinguneqassasoq, akerliusut isumaqarput.

Allattoq Ritzau, Helle Nørrelund Sørensen

juunip 24-at 2024 10:16

Manerassuarmi qeqertarpaat ilaanni Ny Kaledoniami Australiap kangisissortaata imartaaniittuusumi eqqissiviillioqqilerput.

Qeqertarpaat taakkua imarpiup akianiittutut Frankrigimi pisortatigoortumik inissisimasutut nalunaarsoqqapput, Frankrigimilli nunasiaajunnaavinnissaq qeqertarpaat taakkua inuisa ilarpaaluisa, ingammik nunap inoqqaavisa, kissaatigaat.

Ny Kaledoniami illoqarfiit ilaanni Dubeami politeeqarfik tamatumalu saniatigut biilit arlallit ataasinngornermut unnuaani ikuallatsitaapput.

Taasisinnaatitaanermik aaqqissuusseqqilersaarnermut akerliusoqarnerani taama pisoqarpoq. Frankrigimeersummi Ny Kaledoniami ukiuni qulinit ikinnerunngitsuni nunasisimasut nunap immikkoortuini qinersisoqarnerani taasisinnaatitaalersinniarlugit aaqqissuusseqqilersaartoqarpoq.

Qeqertarpaani taakkunani maajimi sapaatit akunnerini marlunni aamma eqqissiviilliortoqartarnerani inuit toqutaasut qulingiluaapput ikiligaasullu hunnorujulikkuutaajullutik.

Aamma atuarukMacron: Ny Kaledoniami piaarnerpaamik eqqissisimanerulertoqarnissaa qulakkeerneqassaaq

Aaqqissuusseqqinnerli nunap inoqqaavisa oqartussaaqataanerannik kimikinnerulersitsisinnaanissaa akerliusut aarleqqutigaat.

Frankrigip præsidentia Emmanuel Macron qeqertarpaanut taakkununnga maajimi eqqissiviilliortoqaleruttornerani tikeraarpoq.

Aaqqissuusseqqinnissaq kinguartinneqassasoq, Emmanuel Macron Ny Kaledoniamilu siuttut taamanikkut isumaqatigiipput. Aaqqissuusseqqilersaarnerli kinguartiinnarnagu taamaatissasoq, nunap inoqqaavisa piumasaraat.

Ny Kaledoniap inui 270.000 missaanniipput, taakkunanngalu 40 procentiisa missaat nunap inoqqaaviupput.