Nuussuup Atuarfiani ikuallatsitsineq: Politiit ilisimannittussarsiortut
![](/sites/default/files/styles/image_934x467/public/article_images/nuussuaq_skole_630_0.jpg?itok=ZStGhY0w)
Nuummi Nuussuup Atuarfia ippassaq unnukkut ikuallatsinneqarpoq.
Kalaallit Nunaanni Politiit oqarnerat naapertorlugu ikuallanneq unnukkut nalunaaqutaq aqqarnup missaani nalunaarutigineqarpoq, ikuallannerlu minutsit 15-it kingorna qaminneqarluni.
Kalaallit Nunaanni Politiit pigaartuisa pisortaata, Jørgen Madsenip oqarnera naapertorlugu ikuallanneq iigaq sinnerlugu siaruaatinngilaq, taamaammallu annertuumik ajoqusiinani.
Politiilli kiap ikuallatsitsineranut atatillugu paasisimasanik amigaateqarlutik Jørgen Madsenip aamma nassuiaatigaa.
Taamaammat innuttaasut sumiiffimmiissimasut pasinartumillu takusaqarsimasut politiinut oqarasuaammut 701448-mut attaveqarnissaat kaammattuutigineqarpoq.
Aatsaat siullermiinngitsoq
Nuummi atuarfik alla siorna novembarimi aamma ikuallappoq.
Ikuallanneq taanna Kangillinnguit Atuarfianni inimi atuartitsivimmi aallartippoq.
Ikuallannerlu anitsiarfimmi atuartut silamiinneranni pivoq.
Tassani ikuallanneq allarutissianik pappiliaasivimmi aallartissimasoq politiit misissuinerisa takutippaat.
Ikuallannerli qanoq aallartissimanera pillugu misissuinerit imaluunniit apersuinerit nassuiaatissaqartitsilinngillat.
Taamaammat Kalaallit Nunaanni Politiit tassani ikuallannerup aallartinneqarsimasinnaanera itigartitsissutiginngilaat.
Suliarli paasissutissanik amigaateqarneq pissutigalugu unitsinneqarpoq.