Nuup umiarsualivittaarnissaa nalorninarpoq

Maanna akisussaaffeqarfimmut naalakkersuisuusoq, Steen Lynge, Atassut, naapertorlugu tigussaasunik aalajangiinissamut maanna tunngavissaqanngilaq. Taamaammat inaarutaasumik aalajangiisoqartinnagu pissutsinik misissoqqaagassaqarpoq.

Naalakkersuisuttaaq pingaarnersiuinermi Nuummi umiarsualiviup qanoq inissisimatinneqarnissaa nalilersoqqaartussaassavaat.

- Naak Jens B oqareeraluartoq suliniut aallarteriaannaasoq, tunngavissaqarluartumik aalajangiitinnata pissutsit arlariit qulaajaqqaartariaqarpagut, Steen Lynge oqarpoq.

Pissutsit pingaaruteqarluinnartut marluk qulaajarneqartariaqartut erseqqissaatigaa. Tassalu kikkut piginnittuussanersut aammalu suliniutissaq qanoq aningaasalersorneqassanersoq. Pissutsit taakku qularnaarneqartinnagit Naalakkersuisunut saqqummiussaqarsinnaannginnerarpoq.

Steen Lyngep naalakkersuisutut siulimi neriorsuutigisimasai akisussaaffigiumanngilai.

Naalakkersuisutut siulivit 2016-imi naammassineqartussatut ullulersimavaa, tamatuma angunissaanut periarfissasi qanoq isikkoqarnasoraagit?

- Tamanna oqaatigisinnaanngilara, tunngavissaqartinnagu oqaaseqarfigisinnaanngilara. Aalajangiinissatsinnut tunngavissaqarluaqqulluta pissutsinik misissuinerit qanoq sivisutigissanersut oqaatigisinnaanngilara.

Nuummi umiarsualivissaq pillugu aalajangeeqqittoqartinnagu Naalakkersuisut sanaartugassanut aningaasartuutit pillugit pingaarnersiueqqaarniarput. Taamaammat sanaartugassatut pilersaarutit pillugit maajip 21-iani aallartittumik isumasioqatigiinniarput. Nuummi umiarsualiviliornissaq Naalakkersuisut pingaarnersiuinerminni sallersaatinneraat siulittaasup tulliata oqaatigisinnaanngilaa, namminerli pingaaruteqartupilussuartut isigaa.

- Politikkimut tunngatillugu, isumaqarpunga assartuussineq pillugu isumalioqatigiissitat assartuussinikkut pingaarnersiunermi inassuteqaataat malinneqartariaqartut, taakkunanilu Nuup Umiarsualivia pingaarnerit ilaattut inissisimatinneqarpoq, Steen Lynge oqarpoq.

Naalakkersuisutut siulini assingalugu piginneqataasussat taassaassangatippai  Namminersorlutik Oqartussat, immaqalu Kommuneqarfik Sermersooq, Royal Arctic Line aamma Aalborg Havn.

Jens B. Frederiksen oqaaseqartinniarlugu attaveqarfiginiarsarigaluaratsigu iluatsinngilarput.