Nuummiut maanna umiarsualivittaarusupput
Ukiut kingulliit ingerlaneranni nassiussat Nuup umiarsualivia aqqusaarlugu assartorneqartut amerliartorput. Taama pisoqarnerani umiarsualivik tattoqisaaffiulersimavoq nassiussallu amerliartornerat qanoq iliuuseqarfigiuminaatsinneqarpoq. Tamanna naammaginanngilaq piaarnerpaamilu iliuuseqarfigineqartariaqartoq, kommunalbestyrelsi isumaqarpoq.
Suliap aallartinneqarnissaa pillugu arlaleriarluni nukingisaarisoqartaraluartoq Nuummi umiarsualiviup allineqarnissaa Naalakkersuisunit suli akuerineqanngilaq. Assartuineq pillugu isumalioqatigiissitat naatsorsuinerat malillugu qanoq iliuuseqannginnermi koruunit milliuunit marlunnik kisitsisitallit ukiumut annaaneqartarput.
Aningaasat umiarsualiviup allineqarnissaanut atugassat piareersimagaluarput. Kommune, Royal Arctic Line aamma Aalborgip umiarsualivia katillugit 80 millioner koruuninik aningaasaliinissamut piareersimapput, aningaasallu taakku affaat kommunip aningaasaliissutigai. Amigaataaginnalersoq tassaavoq naalakkersuisut akuersinissaat.
Maanna qanoq iliuuseqartoqannginneratigut isertitassaagaluit Kalaallit Nunaanni ineriartornermut atorneqarsinnaasut annaaneqartarput immalu nunarsuarmi nunanut allanut iluanaarutaaginnarlutik, borgmester Asii Chemnitz Narup kommunalbestyrelse isumaqatigiissoq sinnerlugu oqarpoq.
