Nuummiut ilorrisimaanngitsut: Erik Jensen naalakkersuisunut siulittaasuussava naamiluunniit?
Erik Jensenip Siumumi siulittaasunngorneranit qaammatit marluk qaangiupput.
Taanna Naalakkersuisunut aamma siulittaasoorusuppoq - Kim Kielsenilli issiavianut suli inginngilaq.
Taassuma naalakkersuisoqatigiit partiivi Nunatta Qitornai Demokraatillu ataatsimeeqatigai - ininiilli ataatsimiiffiusunit nalunaaruteqartoqanngilaq.
Erik Jensenip Nuuk maanna qimaqqippaa Sisimiunullu angerlarluni.
AAMMA ATUARUK Siumut og Naalakkersuisut: Erik Jensen stadig tavs om Naalakkersuisutpost
Aviisi Sermitsiaq naapertorlugu isumaqatigiinniarnerit erngertumik aallartinneqaqqissanngillat: Inatsisartut ukiuunerani ataatsiinnerat februaarip ulluisa 16-ianni aallartippat aatsaat isumaqatigiinniarnerit Erik Jensenip Kim Kielsenimut taarsiinissaanut qulakkeerutaasumik tapersiisoqarnissaanut nikeriaqqittoqassaaq.
Nuummilu innuttaasut naammagittassuseerutilerput:
- Siulittaasunngussava siulittaasunngussanngilaluunniit, ila? Taanna aamma inuiaqatigiit soorlu utaqqimaaraat, Frederikke Mathæussen KNR-imut oqarpoq.
- Pissanganassaaq qanoq ingerlasoqarnissaa.
Nuka Benjaminsen. Assi: KNR
Nuka Benjaminsen aamma naammagittassuseerutilerpoq:
- Paasissutissiineq ajoramik oqaannavittarlutik ima ittoqassooq ima ittoqassooq. Naammaginannginnami qinersisartuulluni.
AAMMA ATUARUK Erik Jensen isumaqatiginninniartoq: Siulittaasunngortiinnarneqassava imaluunniit qinersisoqassava?
Inatsisartut ukiukkut ataatsimiinnaranut atatillugu siulittaasunik nikittoqanngikkuni marlunnik pisoqarsinnaavoq:
Kim Kielsen Naalakkersuisunut siulittaasuuginnarsinnaavoq, imaluunniit qinersinissamik aamma suaaruteqarsinnaalluni.
Siumup siulittaasussaanik qinersisoqarmat, Erik Jensen 39nik taaneqarluni siulittaasunngorpoq. Kim Kielsen 32-nik taaneqarluni.
