Nuummiut: Borgmesterinngortussaq tatiginartuussaaq
Kommuneqarfik Sermersooq allamik ullumi borgmesterertaassaaq.
Tamanna Inuit Ataqatigiit borgmesterinngortussatut innersuussaat kommunalbestyrelsemit akuerineqareeriarpat pissaaq.
Maanna borgmesteri, Charlotte Ludvigsen (IA), ataasiaannarani kukkorujussuareerluni tunuarniuteqarniarluni tallimanngormat nalunaarpoq.
Kukkorujussuarneri marluusut aningaasanik attartornermut pisinermullu isumaqatigiissutinut tunngapput, taakkualu tamarmik immikkut 20 millionit koruuninik aningaasartaqarput. Taakkuali kommunalbestyrelsimit akuersinertalimmik itigartitsinertalimmilluunniit oqaluuserineqarsimannginnerat qassiiliutaapput.
Nuummiullu KNR-ip apersugai borgmesterip tunuarniuteqarneranut paasinnipput.
- Tunuarniuteqarluni nalunaarnera tupiginngilara, Lauritz Efraemsen oqarpoq.
Lauritz Efraemsen. Assiliisoq: Karline Platou
Søster Hermarej isumaqataavoq.
- Tusaamasakka malillugit pissusissamisoorpoq tunuarnissaa, sanaartugassanummi qulakkeerinnittarsimanngilaq, taanna oqarpoq.
Søster Hermarej. Assiliisoq: Karline Platou
- Pissusissamisoorsoraara, tunuaraluarpat ajunngilaq aammami akisussaaffik tiguaa tunuarnermigut, Grethe Siegstad oqarpoq.
Paasissutissat: Ineqarneq pillugu periuserineqartoq malittarisassanik unioqqutitsisoq
-
Ulloq 9. novembari 2021 Namminersorlutik Oqartussat Nakkutilliisuisa kommunip ingerlatsivinnut namminersortunut sivisuumik atuinissamut isumaqatigiissuteqaqqinnissaa unitsippaat, tassani kommunip inissiat nalinginnaasutut Iserit aqqutigalugu attartorteqqittarai.
-
Periaaseq taanna kommunip 2015-imiilli inissianik pissarsiniarluni atortarsimavaa.
- Nakkutilliisut nalilerpaat periaaseq taanna kommuninut pisinnaatitsisummik uniuinerusoq.
- Borgmesterip, Charlotte Ludvigsenip kommunimi ataatsimiititaliap isumagisimanngisaanik 20 millionit koruuninik atornissaq akuerinikuusimagaa siorna novembarimi saqqummersinneqarpoq.
- Aningaasat atukkat kommunip inissiaatileqatigiiffiata Iserip inissianik 2025-mi pisisinnaanissaanut atorneqartussaapput.
-
20 millionit koruuninullu allanut tunngasumik suliamik politikkikkut aamma akuerineqanngitsunik ullumi saqqummertoqaqqippoq. Tamatumuuna asfaltiliorfimmik Munck Gruppenimit 2020-mi pisineruvoq, isumaqatigiissut taanna borgmesterip kommunalbestyrelsip suliamik isumaginninnginneratigut atsiorsimavaa.
- Nammineq aalajangigarimmagu ataqqivara, Sara Lyberth oqarpoq.
Siulia ukiuni aqqanilinni borgmesteriusoq
Charlotte Ludvigsen 2019-imi junimi borgmesterinngorpoq, Asii Chemnitz Narup taaserlugu. Asii Chemnitz taamani aamma tunuarpoq – DR-ip Tasiilami inuuniarnermikkut ilungersunartunik aqqusaagaqarsimasut pillugit piviusulersaarutaa saqqummereersorlu taamaaliorpoq.
Taanna Charlotte Ludvigseniminngarnit sivisunerusumik tassa ukiuni aqqanilinni borgmesteriuvoq.
Taava borgmesterinngortussaq qanoq ittuusariaqarpa?
Peqqussutinik malittarinnittuusariaqartoq, nuummiut isumaqarput.
- Peqqussutinik malittarinneqqissaarlunilu innuttaminut tatiginartumik ingerlasuusariaqarpoq, Lauritz Efraemsen oqarpoq.
- Innuttaminut aamma tatiginartuusariaqarpoq.
- Suleqatiminut attaveqallaqqissuusariaqarpoq aamma kisermaassisuunaveersaartussaavoq, Søster Hermarej oqarpoq.
Grethe Siegstad. Assiliisoq: Karline Platou
Borgmesterinngortussarlu aningaasaqarnermut tunngasunik ilisimannittariaqartoq, Grethe Siegstad aamma isumaqarpoq.
- Aningaasartuutit, siunnerfeqarneq taavalu kommunalbestyrelsemi ataatsimoortitsineq pingaarnersaasa aamma ilagivaat, Grethe Siegstad oqarpoq.
Borgmesterinngortussarli aamma mianerisassaqarpoq.
Sara Lyberth. Assiliisoq: Karline Platou
- Inuttut allatulli imminut isigaluni tunuleriiaattuni siullinngortassanngilaq, Sara Lyberth siorna aasakkut pisoq oqallisaaqisoq pillugu oqarpoq.
Charlotte Ludvigsenimi Nuummi akiuussutissamik kapitikkiartorlutik siuleriiaattorpassuit qaangiinnarlugit kapitikkiartorpoq. Akiuussutissallu siuleriiaattut tamarmik kapitinnissaannut taamanikkut naammanngillat.
Borgmesterinngortussaq isumaginninnermut tunngasunik aamma ukkassinerusariaqartoq, Sara Lyberth isumaqarpoq.
- Nuummi meeqqat taakkualu atugaat isigineqarnerusariaqarput. Aamma innarluutillit innarluuteqanngikkaluartullumi kommunimi assigiimmik pineqarnissaat ikiorneqarnissaallu pisariaqarpoq, Sara Lyberth oqarpoq.
Charlotte Ludvigsen borgmesterinngornissani sioqqullugu kommunalbestyrelsimut 2017-imi qinersinermi 77-init taaguunneqarpoq. Siornalu apriilimi qinersinermi 1512-init taaguunneqarpoq.
