Nuummiit angalaqqusaannginneq unnuap-qeqqanit atorunnaarsinneqassasoq
Nuummit angalasoqaqqusaannginnera unnuaru atorunnaarsinneqassaaq.
Tamanna Tunillaassortunik nappaalanersuaqarneranut ataatsimiititaliarsuup paasissutissiissutigaa.
Illoqarfiit pingaarnersaannit angalaqqusaannginneq unnugu nalunaaqutaq 23.59 atorunnaarsinneqassaaq.
Taamaakkaluartorli kisianneqarpoq. Air Greenlandip timmisartuutai suli angalasinnaanngillat, timmisartuusseqqusinnginnermi apriilip ulluisa 30-annut atuuppoq.
AAMMA ATUARUK Ataasinngorneq: Ullut 16-issaanni nutaanik tunillatsittoqarsimanngitsoq
Namminerli umiatsiaaqqamik illoqarfiit pingaarnersaannit aallartoqarsinnaavoq. Tunngaviusumillu Ilulissanut Qaqortumullu angalasoqarsinnaavoq - kisianni tamanna Tunillaassortunik Nappaalanersuaqarneranut Ataatsimiititaliarsuup tamanna innersuussutiginngilaa.
Timmisartumimmi umiarsuarmillu angallannermut killilersuinerit suli atuupput. Killilersuinerillu sumiiffiit killeqarfiusut qaangeqqusaannginnerannik ilaqarput - aatsaallu pisariaqavippat angalasoqarsinnaalluni.
Coronamik tunillatsittoqarani ullut 17-it ingerlapput
Tamannali innersuussutaavoq inerteqqutaanani. Taamaammat innersuussutit malinneqannginneranni politiit akiliisitsiniarsinnaanngillat. Pisariaqavinngitsumillu angalasoqarnissaa Naalakkersuisut innersuussutinngilaat.
Taamaakkaluartorli Nuup, Kapisillit Qeqertarsuatsiaallu akornanni angalanerup inerteqqutigineqarnera maanna atorunnaarsinneqarpoq. Nunatsinni coronamik tunillatsissimasunik nutaanik nassaartoqarani sapaatit-akunnera marluk qaangiutereerpata aatsaat illoqarfiit pingaarnersaanni inerteqqutaalluinnartut killilersuinerillu sakkukillineqarsinnaalissasut, Naalakkersuisut siulittaasuata, Kim Kielsenip nunattalu nakorsaanerata Henrik L. Hansenip siusinnerusukkut oqaatiginikuuaat.
Ullumi marlunngornermi tunillatsissimasunik nutaanik nassaartoqarani ullut 17-it ingerlareerput.
Qaammammi ataatsimi angalaneq inerteqqutaasoq
Angalaqqusaannginneq marsip ulluisa 18-ianniilli atuutilersinneqarpoq.
Anganerup inerteqqutaalernera Nuummi coronamik tunillatsissimasoq nutaaq marsip ulluisa 18-ianni paasineqareersorli assigiinngitsunik qassiusunik piumasaqaateqartoqalerpoq.
Tunillatsissimasoq taanna sumi tunillatsissimanera aralaannaanilluunniit ilisimaneqanngilaq, taamaammallu illoqarfiit pingaarnersaat matuneqarpoq.
AAMMA ATUARUK Tamaat isigalugu: Coronavirus pillugu killiffik
Nuummiit timmisartukkut umiarsuakkullu angallannerit tamarmik inerteqqutaalerput, illoqarfiillu pingaarnersaanni innuttaasut angalanissaat inerteqqutaalerluni.
Nunatsinnut angalaniartut "pissutissaqavikkunik" aatsaat isersinnaatitaapput.
Naalakkersuisut innersuussutit nutaat pillugit aqagu pingasunngornermi nalunaaqutaq 14.00 tusagassiortunik katersortitsissapput.
