Ataasinngorneq: Ullut 16-issaanni nutaanik tunillatsittoqarsimanngitsoq
Coronavirusimik nunatsinni ullut 16-issaanni nutaanik tunillatsittoqarsimanngitsoq ataasinngornermi nalunaarutigineqarpoq.
Inunnik 14-inik misissueqqittoqarpoq, taakkulu tamarmik tunillatsissimanngitsut, nunatsinni nakorsaaneqarfiup nalunaarutigaa.
Nunatsinni inuit misissortissimasut katillugit 1133-upput. Taakkunannga aqqanillit tunillatsinnikuupput – tamarmillu peqqisseqqinnikuullutik. Taakkunannga arlaannaalluunniit napparsimmavimmi uninnganikuunngilaq.
Coronavirusimik sapaatit akunneri marluk ingerlaneranni nutaanik tunillatsittoqarsimanngippat, nunarput ammariartoqqissasoq oqartussat nalunaarutigereernikuuaat.
AAMMA ATUARUK Danmarkimi inuit amerlanerusut katersuussinnaalissasut
Nunatsinni atuarfiit ammariartoqqipput. Nuummi atuarfiit meeqqeriviillu sapaatit akunneranni uani ammariartoqqissapput.
Naalakkersuisut nunatsinni killilersuinernut tunngatillugu allannguinerit pillugit sapaatip akunnerata naanerani nalunaaruteqaqqissapput. Nuummi inuit katerinnermi amerlanerpaamik quliunissaat suli innersuussutaavoq, tassanilu neriniartarfiit, imerniartarfiit, timersoqatigiiffiit timimillu sungisaaviit apriilip ulluisa 30-ata tungaanut matoqqagallarput.
Nunatta sinnerani inuit katerinnermi amerlanerpaamik 100-unissaat suli innersuussutaavoq.
Nunatsinni angalaneq nunatsinniillu angalaneq apriilip ulluisa 30-ata tungaanut suli inerteqqutaagallarpoq.
