Nuummi umiatsiaararsortut atuisutut akiliissanngitsut
Nuummi umiatsiaararsortunut ulloq nuannersuuvoq. Aalisartut pisami ilaannik umiarsualiviup Sikuki Nuuk Harbourip allaffeqarfianut akiliuteqartarnissartik piffissami sivisuumi pakatsissutigeqqasimavaat, tamanna Siumumit Naleqqamiillu politikkikkut taperserneqarpoq.
Aalisartut aalisakkanik qalerualinnillu Nuummi umiarsualivimmut usingiaraangamik tonsimut pisaminnik 38,64 koruunimik juulip ulluisa aallaqqaataannit akiliisarunnaassapput. Sinerissap qanittuani aalisariutit ukiumut aningaasartuutaat 19.874 koruuniusoq aamma affaannanngortinneqarluni talittarfeqarnermut 10.000 koruunimik akiliisalissapput.
AAMMA ATUARUK Umiarsualiviit atuisunit akilerneqartarnissaannut KNAPK sakkortuumik akerliuvoq: Aalisartut akiligassaqareeqaat
Tamanna Naalakkersuisut aamma Sikuki Harbourip tusagassiuutinut nalunaarutigaat.
- Naalakkersuisuniit nuannaarutigaarput Sikuki pitsaasumik ajunngitsumillu oqaloqatigilluareernerata kingunerisaanik, Nuummi aalisarnermik piniarnermillu inuussutissarsiuteqartunut aaqqiissutissanik Naalakkersuisut kissaatigisaateqarnerat malillugu aaqqeeqatigiissinnaasimagatta. Aaqqiissutit, sinerissap qanittuani aalisartunut iluaqutaasussat Sikukip akiinik appaanerinik malitseqartumik, ineqarnermut attaveqaasersuutinullu naalakkersuisoq, Erik jensen (Siumut) tusagassiuutinut nalunaarummi allappoq.
Umiarsuit takornariartaatit akiliinerussasut
Allannguineq Sikuki Nuuk Harbourip umiarsualivitoqqamik umiarsualivimmillu nutaamik ingerlatsisup isertitakinnerulernissaanik tamanna soorunami isumaqarpoq. Aningaasat piginneqatigiiffiup umiarsualivimmik aserfallatsaaliuinissamut umiarsualivimmillu nutaamik sanaartornissamut aningaasanik atukkanik taarsiinissamut atortarpai.
Sikuki Nuuk Harbourimut akiliutit nutaat pillugit takussutissaq naapertorlugu umiarsuarnut takornariartaatinut ilaasunut akiliutit aappaagumit atuutilersinneqassapput, ilaasumut ataatsimut 10 koruuneqassaaq.
- Sikukip akinut allattuiffianik iluarsiinissaq pillugu suliap ingerlanerani ingerlatseqatigiiffimmiit Ineqarnermut Attaveqaasersuutinullu Naalakkersuisoqarfik oqaloqatigilluarneqarpoq, aammalu ingerlatseqatigiiffiup akinut allattuiffianik iluarsiineq taperserneqarpoq, aammalu sinerissap qanittuani aalisartunut umiatsiaararsortut angallataatillillu atuisut akiliutigineqartartup appartinneqarnissaa maanna aaqqiivigineqarluni, Sikuki Nuuk Harbour tusagassiuutinut nalunaarummi allappoq.
Atuisunut akiliutit politikkikkut unammissutaasut
Umiatsiaararsortunut Sikuki Nuuk Harbourimut atuisunut akiliutit Naleqqap Inuit Ataqatigiillu akornanni isumaqatigiinngissutaanikuuvoq.
Naleqqamit Jens Napaattuup taamani ineqarnermut attaveqaasersuutinullu naalakkersuisuusup, Mariane Paviasenip Nuummi umiatsiaararsortunut atuisunut akiliutit erngertumik peersissagai piumanikuuaa.
AAMMA ATUARUK Naalakkersuisut piumasaraat umiarsualiviit amerlanerit atuisunit akiliiffigineqartalernissaat
Tamanna naalakkersuisumit itigartitsissutigineqarpoq, taassumalu atuisunut akiliutit nunatsinni illoqarfinni allani aamma atuutilernissaat naatsorsuutigineqartariaqarnerpaa. Umiarsualiviimmi pisoqqat nutarterneqarlutillu iluarsartuunneqartariaqartut atuisunullu isumannaatsuutinneqarnissaanut aserfallatsaaliorneqarnissaannut aningaasartuutissaqarneruvoq. Namminersorlutik Oqartussanit nalunaarusiaq naapertorlugu aserfallatsaaliuinissamut 270 millionit koruunit aningaasartuutigineqartariaqarput.
Siumumiillu Erik Jensen ineqarnermut attaveqaasersuutinullu naalakkersuisutut aalisariutit umiatsiaararsortullu aningaasartuutaasa ilaannut oqilisaateqarnissamut Sikuki Nuuk Harbourimut aaqqiissutissarsivoq.
