Nuummi ukiorpassuit kollegiassaaleqineq suli taamaappoq
![](/sites/default/files/styles/image_934x467/public/article_images/emj-atcon-kollegie-nuuk_5.jpg?itok=oJ0CKIlv)
Ilinniartorpassuit nuannaarlutik ataasinngorpat aallartissapput, arlaqaqaalli aamma kollegiami inissaqannginnerminnik ernummateqartut.
Tamanna ukiorpassuarni tusartuarparput ukioq mannattaaq aamma taamaappoq. Ukioq manna kollegiamut qinnuteqaraluartut 37-t inissaqartinneqanngitsut, kollegianut allaffeqarfimmi KAF-miit oqaatigineqarpoq.
Inissaqartinneqanngitsunut 37-nut pakatsinaraluartoq, ukiunulli siuliinut sanilliullugu itigartinneqartut ikinnerupput siornatigummi 100-t missaat itigartinneqartaraluarput, KAF-imi atorfilik Peter Hardenberg Davidsen oqarpoq.
- 37-innarnut itigartitsinerput tupaallaatigaarput, taanna oqarpoq.
SIK-mili inuusuttaasut ilinniartullu atugaannik soqutigisaqartuusut ajornartorsiut qatsulluinnarpaat, taakkumi isumaqarput, ajornartorsiut ukiorpassuarni atuukkaluartoq iliuuseqarfigineqangaarneq ajortoq.
- SIK-p inuusuttaanni qangali kollegiassaaleqisarneq oqaluuserisarparput, aamma Ilinniartitaanermut Naalakkersuisoq siusinnerusukkut tamanna pillugu ataatsimeeqatiginikuuarput, kisianni maannamut allanngortoqarneranik malunnartoqarneq ajorpoq, Peter Mølgaard SIK-p inuusuttaaneersoq oqarpoq.
Atuarunnaartarput
Kollegiassaaleqinerujussuup kingunerisarpaa ilinniartorpassuit ilinniakkaminnik unitsitsiinnartariaqartarmata, taamaattumilluuna kollegiassaaleqinerujussuaq inuiaqatigiittut isigalugu ajornartorsiutaasoq, SIK-p inuusuttaat isumaqarput.
- Nunatsinni aningaasat kaaviiaartinneqalissagaluarput, tassami nunatsinnut peqqissaasunik avataaneersunik tikisitsiuaannassagutta aningaasarpassuit atorneqartarsimassapput. Erseqqissaatigineqartuarpoq nunarput peqqissaasunik amerlasoorpassuarnik amigaateqartoq aappaatigullu, ilinnialernialerpata kollegiani inissaqartinneqarneq ajorput, Peter Mølgaard uparuaavoq.
KAF-ili naapertorlugu, kollegiami inissanik 736-nik agguaassinermi ilinniartut sumi ilinniartuuneri pillugit tulleriiaarisoqarneq ajorpoq. Ukioq manna inuit kisimiittut 12-t itigartippagut, ilaqutariillu meerartallit 18-t itigartippagut kisimiillutillu meerallit arfineq-marluk itigartippagut, taanna oqarpoq.
SIK-p inuusuttaaniilli Peter Mølgaard naapertorlugu pingaaruteqarpoq ilinniartut angajoqqaat salliutinneqartariaqaraluarput.
- Eqqaamassavarput kalaallit meerartaajaartartut amerlasoorujussuummata taakkualu aamma allatulli inissaqarlutik ilinnialersinnaasariaqarput, taanna oqarpoq.
Inuusuttut ilaqutariillu utaqqisuni salliussasut
Kollegianut allaffeqarfik KAF naapertorlugu ilinniartut ilinniartooreersut nutaavinniit salliutinneqartarput.
- Ilinniartut ilinniartooreersut atuagarsortussat soorlu qaammatini pingasuni ukiulluunniit affaani kollegiami najugaqartussat salliutittarpagut, taakkumi soorunami qanorluunniit inissaqartinneqartussaapput, Peter Hardenberg Davidsen oqarpoq.
Aappaaguli kollegialiat nutaat atulerpata inuusuttut 18- ataallugit ukiullit aammalu ilaqutallit kollegiamiissinnaalissapput.
- Pingaartipparput taakku aamma inissaqarnissaat, 18-lli ataallugit inissinneqartalerpata taakkununnga paarsisartussat aamma atorfinitsinneqassapput, kollegiat sinneri ilaqutalinnut kollegiaassapput, Peter Hardenberg Davidsen oqarpoq.
Sinerissamittaaq kollegialiortitsisoqarpoq, tamarmilli inissaqarnavianngitsut SIK-p inuusuttaanni siulittaasoq uparuaavoq.
- Maannakkullu sanaartorneqartut ”nipangersaatitupajaaq” isigigatsigit maanna tamanna qisuariaatigaarput. Soorunami pitsanngoriaataassapput tamanulli pitsanngoriaataanavianngillat, Peter Mølgaard oqarpoq.