Nuummi Tivoli arfininngorpat ammassaaq

Aaqqissuussinermilu inersimasunut nuannaarutaasinnaasut aamma pissapput.

Maannakkorpiaq Inussivimmi nuummilu timersortarfissuarmi sulisut, timersortarfissuup eqqaa tivoleqarnissaanut piareersaleruttorpaat.

Tivolimik aaqqissuisut aaqqissuussineq qangatut taavaat pitsaaneruinnartoq, tamannalu tunngavissaqarluarpoq.

- Tassa maannakkorpiaq radiobiili aaqqissuupparput, danmarkimi tivolimi pigineqartut assinga, tassani biilit 13-iupput. Assigiinngitsullu pingasut kaavittut ataaseq angisoorsuaq qummut ingerlaartartoq, tassa alutornartorujussuaq aamma allanartorujussuulluni, aamma twisterimik taasarpaat Disney, børneflyverilu, timersortarfinni Tivolimilu pisortaq, Jens Christian Berthelsen taama oqarpoq.

Nuummi Tivoleqaqqittalernera siorna piviusunngorpoq, Sct. Georgs Gildemiit Tivolimi atortut Nuummi Illorsuarmut timersortarfimmut Inussivimmullu tunimmagit.

Siorna silap ajornera peqqutaalluni aaqqissuussineq kinguartinneqarpoq ukiormannalu aaqqissuussineq naammassilluarneqarumaartoq, pisortap neriorsuutigaa.

Ulluni qulingiluani ingerlanneqassaaq

Tivoleqarnissaq ulluni qulingiluani ingerlanneqassaaq, eqquiniaatitsiffiit maskinallu nutaat nutaanngitsullu atorneqassallutik. Saniatigut nipilersortartut qulit assigiinngitsut scenemi appisimaarnissaat pilersaarutaavoq.

Aaqqissuisoqarneratalu nalaani eqquiniaatitsilluni makitsisoqartassaaq, tassani 1000 koruunit savaaraq affaq aamma allanartumik eqqugassaqassalluni.

- Kingullerpaat sapaammi pisussaq, tassani makitsisoqassaaq Qooqqunut inunnut sisamanut akeqanngitsumik taqqamunngartoqarsinnaassooq, pissanganalaartunut ilaassaaq, Jens Christian Berthelsen Timersortarfinni tivolimilu pisortaq taama oqarpoq.

Tivoleqarnissaq arfininngornermi aggustip 29-nni aallartissaaq sapaallu septembarip arfernerani naammassineqarluni.