Nunatsinni kommunit tallimat eqqagassalerinermut ingerlatseqatigiiffimmik ataatsimoorlutik pilersitsipput. Ingerlatseqatigiiffiup Nuummi Sisimiunilu ikuallaaviit nutaat marluk ingerlanneqarnerat isumagissavaa. Toqqorsivimmit assi Assi: Mads Pedersen/KNR

Nuummi Sisimiunilu ikuallaaviit nutaat illoqarfinni allani ikuallaaviit matussagaat

Illoqarfinni tamani, Sisimiut Nuullu minillugit ikuallaaviit matuneqarnissaat kommuninit pilersaarutigineqarpoq. Tamannali suliffinnik annaasaqarfiussanngilaq, killormuuanilli.

Nunatsinni kommunit tallimat Sisimiuni Nuummilu nutaalianik ikuallaaveqalernissaanut 400 millionit koruuninik aningaasaliiniarput. Taamaliornerup nunatsinni eqqagassalerineq pitsaanerulersissavaa avatangiisinullu sunniuteqarnerluutai millisillugit.

Taamaaliornerli illoqarfiit sinnerini ikuallaaviit matuneqarnissaannik aamma isumaqarpoq. Eqqagassaleriffimmi pilersinneqaqqammersumi, ESANI A/S-imi pisortaq, Frank Rasmussen taama oqarpoq.

AAMMA ATUARUK Kommunit eqqagassaleriffimmik ataatsimoorussamik pilersitsipput

- Atorunnaarsinneqassapput ikuallaaviillu nutaat piareerpata matuneqassallutik. Ikuallaaviimmi pisoqqat matuneqassapput, ilaallu piffissaq sioqqullugu immaqa matuneqassallutik.

Paasissutissat
- Nunatsinni kommunit tallimat ataatsimoorlutik eqqagassalerinermik ingerlatseqatigiiffik pilersippaat.
- Ingerlatseqatigiiffiup Nuummi Sisimiunilu ikuallaaviit nutaat marluk ingerlanneqarnerat isumagissavaa.
- Tamanna Nunatsinni eqqagassalerinermik pitsaanerulersitsissaaq avatangiisinullu mingutsitsinnginnerulluni.
- 400 millionit koruuninik akeqassaaq.
- Sisimiuni ikuallaavissap nutaap 2022-mi piareernissaa Nuummiittussallu 2023-mi piareernissaa naatsorsuutigineqarpoq.
- Ilulissani, Aasianni, Nuummi, Sisimiuni Qaqortumilu ullumikkut ikuallaaveqarpoq.

Frank Rasmussenilli suliffinnik assersuutigalugu Aasianni Qaqortumiluunniit annaasaqartoqaratarsinnaanissaa ernumassutigineqassanngitsoq erseqqissaatigaa. Killormuuanilli.

- Eqqagassat siusinnerusumit pitsaanerusumik suliarineqarnissaat kissaatigineqaraluttuinnarpoq, taamaammat minnerpaamik ullumikkut sulisorineqartut pisariaqartissagigut ilimagaara, Frank Rasmussen oqarpoq,  eqqakkanillu immikkoortiterineq ikuallaavimmik ingerlatsinermiit sulisoqarnerunissaq pisariaqartinneqassanerarlugu.

- Taamaammat  eqqagassaleriviit siunissami suliffissaqarfiunerunissaat qularutiginngilara.

Immikkoortiterisoqarnerulissasoq

Tassami nutaanik anginerusunillu ikuallaaviliornikkut illoqarfiinit allaniit nunaqarfinniillueqqagassanik assartuisalernissaq pilersaarutaavoq, eqqagassallu nassiunneqannginnerini immikkoortiterneqaqqaartassapput.

Tamanna kommunimi sulisunut immaqalu innuttaasunut ataasiakkaanut suliassaqarnerutitsilissaaq. Innuttaasummi nammineerlutit eqqagassanik immikkoortiterisalernerat iluaqataangaatsiarsinnaasoq, Frank Rasmussen oqarpoq.

AAMMA ATUARUK Eqqakkanik ikuallaavittaassat 400 millionit koruunit pallillugit akeqassasut

- Pingaartumik illoqarfinnit nassitsisarfiusussanit immikkoortiterisarneq eqqunneqarsinnaassaaq. Eqqagassat saviminerngit igalaamernillu immaqalu nerisakut nassiunneqartussat immikkoortiternissaat isumaqarluarpoq, ingerlatseqatigiiffimmi pisortaq oqarpoq.

Aammattaaq illoqarfinni assigiinngitsuni innuttaasunit eqqagassanik isumaginniffiusussani eqqagassanik tigooqqaavinnik pilersitsisoqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat