Politiit ullormut nalunaarusiaat: Nuummi seqqortoqarsimasinnaasoq

Nunatta avannaani kujataanilu sumiiffinni assigiinngitsuni marlunni tillinniartoqarsimavoq, Nuummilu politiit Nuussuarmi seqqortoqarneranik nalunaarutigineqartumut ornigupput.

Allattoq Hanna Vestergaard Hviid

novembarip 20-at 2023 10:36

Nutserisoq Connie Fontain

Kalaallit Nunaanni Politiiit Nuup ilaani Nuussuarmi sapaammi unnukkut seqqorpaluttoqarfiusumut ornigupput.

Seqqorpaluttoqarnera, imminnut attuumassuteqanngitsunit marlunnit nalunaarutigineqarpoq.

Kalaallit Nunaanni Politiit pigaartuisa pisortaat, Karl Sværd KNR-imut paasissutissiivoq.

- Politiinik isumannaallisaanermik atortulersorsimasunik ornigutsitsivugut, seqqorpaluttoqarneralu sumiissusersiniarsaralugu, tamannali iluatsinngilaq.

Politiit inunnik pisumut ilisimannittunik tusarfigineqarusupput.

Tillinniarnerit marluk

Illoqarfiit pingaarnersaata avataani politiit unnuaq aamma suliaqarput. Nunatta avannaani kujataanilu marlunnik tillinniartoqarpoq.

Qaqortumi politiit sutorniartarfimmut tillinniartoqarneranik nalunaaqutaq 04.03 nalunaarfigineqarput. Rødvininik tillittoqarpoq.

Aamma atuaruk Meeqqat unnuariat: Serlersaarisut tillinniallu nunatsinni naalliuutaasut

Ilulissani eqqumiitsulianik katersugaafivimmut tillinniartoqarpoq. Politiit tillinniartoqarsimaneranik nalunaaqutaq 02.11 nalunaarfigineqarput.

- Tillinniartoqarsimanera unnuaq saaffiginnissutigineqarmat sumik tillittoqarsimanera piffissami matumani ilisimaneqanngilaq, Karl Sværd oqarpoq.

Politiit suliamut tassunga atatillugu inuttaasunit paasissutissaateqarsinnaasunit aamma attaveqarfigineqarusupput.