Nuummi Røde Kors 300.000 koruunit nalingalu ilaqutarinnut 150-inut, Frelsens Hærimilu 100.000 koruuit nalinganut ilaqutariinnut 100-nut juullimut tapiissuteqassapput.Assi: Aron David Karlsen

Nuummi Røde korsi juullimut tapiissuteqassaaq – ukioq mannali ikinnerusut taperneqassapput

Nunarpulli tamakkerlugu ilaqutariinnut meerartalinnut siullermeerluni Nuummi Frelsens Hær juullimut tapiissutinik agguaassaaq.

Nanu Meeqqani juullileraanga juullimut tapiissutinik agguaasarneq ileqquugaluarpoq. Tamannali peqatigiiffmmi ilaasortat ikilernerisa kingorna sulisussamik amigaateqarneq pissutigalugu juullimut tapiissuteqartoqassanngilaq.

Tapiissutinik qinnuteqarnissarnut eqqarsarsimaguit suli neriuutissaqarputit.

Kalaallimmi Røde Korsiata Nuummi immikkoortortaqarfiani Nuummiittunut, Frelsens Hærimiillu nunarput tamakkerlugu juullimut tapiissutinik agguaasussaapput.

Røde Korsip Nuummi immikkoortortaqarfia siornaak juullimut tapiissuttaannut sanilliullugu ilaqutariinnut ikinnerusunut ukioq manna agguaassasoq, Kalaallit Røde Korsiata Nuummi imikkoortortaqarfiani siulittaasoq, Ane Marie Lauritsen oqarpoq.

- Ilinniartut ukioq manna ilanngutinngilagut, peqqutigalugu ilinniartut kolligiani najugaqartarput, taakkulu najugaqarfigalugit akikipput, kallerup inneranullu akiliineq ajorlutik, meeraqaraangamillu akikitsunnguami meeqqerivimmut akiliuteqartarlutik.

AAMMA ATUARUK Nanu Meeqqanit juullimut ukioq manna tapiissuteqassanngitsoq

Røde Korsi juullimut tapiinissaminut qinnuteqartitsigaangat inuit 400-t sinnerlugit qinnuteqakkajuttarput.

Tamakkerlutilli tapiiffigineqarsinnaaneq ajorput, Røde Korsip aningaasaatai aamma killeqarmata.

Juullimut tapiissutissat ukioq manna ikinnerusut agguaanneqassapput, tamanna peqatigiiffiup aningaasaataasa ikiorsiissutinut allanut aamma atorneqarnikuunerat peqqutaavoq.

- Tasiilami piterarnerata kingorna aseruatitertunut 50.000 koruuninik tapiivugut, taakku saniatigut 50.000 koruunit aamma juullimut tapiissutit aamma Tasiilamut nassiuppagut, Ane Marie Lauritsen oqarpoq.

Taamaammat isertitakitsut ukioq manna isiginarneqarnerupput.

-  Inuit isertitakitsut tapiiffigineqarneq ajortut, taakku ikiorusullugit ujartorpagut. Taakkuuku ukioq manna ikiorusukkigut. Ikiorsiissutit ilaqutariinnut taamaallaat meerartalinnut tunniunneqassapput.

Nuummi Røde Korsip immikkoortortaqarfia ilaqutariinnut meerartalinnut juullimut tapiissutinik devembarip 8-ni 9-anilu Røde Korsip allaffeqarfiani blok 3-mi qinuteqartitsissapput. Decembarillu 21-ani Nuuk Centerimi akuerisaasunut gavekortinik agguaassallutik.

Ane Marie Laurtsenip oqarnera naapertorlugu ilaqutariit Nuummiittut 150-it tapiiffigineqarnissaat naatsorsuutigineqarpoq.

Nunatta sineriaaniittut aamma tapiiffigineqassasut

Nuummi Frelsens Hæri juullimut tapiissutinik ukioq manna siullerpaamik agguaassaaq.

Taanna sinerissami suminngaaanneeraluartunilluunniit tapiinissaminut sulissuteqartoq, Nuummi Frelsens Hærimi aqutsisoq, Nathaniel Münch oqarpoq.

- Ilaqutariinnut meerartalinnut juullimut tapiissuteqassaagut. Aamma aatakku aanakkut ernuttaminnik juullisioqateqarniartut tapiiffigisinnaavagut, taanna oqarpoq.

Frelsens Hær ukiut siuliini aningaasaliinikuuvoq, kikkulli ikiorneqarsinnanerannut maleruagassat sukangangammata ikitsuinnaat ikiorserneqarsimapput, taamaammallu ukioq manna siullermeerlutik allatut tapiissuteqassapput.

- Ilaqutariinnut meerartalinnut juullimut tapiissutinik amerlanerusunik tunniussiumalluta aningaasat nalinganut aalajangersimasumut pisissutissamik tuniserusulluta aningaasanik piumanikuuvugut, Nathaniel Münch oqarpoq.

Frelsens Hærimut juullimut tapiissutinik qinnuteqarsinnaaneq sapaatit akunnerata tulliani ammassaaq.

Ilaqutariit 100-t tapiiffigineqassapput.

Akuerisaasullu sapaatit akunneri marluk qaangiuppata agguaanneqassasut, aqutsisoq KNR-imut oqarpoq.

 

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl