Nanu Meeqqanit juullimut ukioq manna tapiissuteqassanngitsoq

Nanu Meqqanit juullimut ukioq manna ikiuisoqassanngilaq. Tamatumanimmi aaqqissuussisussaqanngilaq.

Nanu Meeqqat tusagassiuutinut nalunaarummi namminneq allapput. Nammineq kajumissutsimik suliaqarfiusumi peqatigiiffimmi siulersuisut sisamanit marlunnut ukioq manna ikilisimasut nalunaarummi aamma allapput.

Siulersuisunut ilaasortap aappaa juullimut ikiuisoqarnissaanik qulakkeerisussaq ilinniakkaminik naammassinnikkiartulerpoq, tamatumalu saniatigut sulisarluni.

Siulersuisunut ilaasortap aappaa suliffeqarfinnik marlunnik ingerlataqarluni ulapippoq.

Ukioq manna pingaartumik uggornartoq

- Tassa imaappoq kajumissutsiminnik sulisut marluusut tamarmik juulleriartornerani aningaasanik katersinissamut, oqartussat attaveqarfigalugillu suleqatiginissaanut kiisalu juullimi tapiissummut pisiortornissamut attaveqarneq isumaginninnermullu ajoraluartumik piffissaqanngitsut ukioq manna, Nanu Meeqqat tusagassiuutinut nalunaarummi allappoq.

- Ajuusaarnaqaaq ukioq manna Nanu Meeqqat Juulliat ingerlassinnaanagu, amerlasoorpassuimmi neriuutigisarpaat juulleriartornerani taperneqassallutik. Ingammik ukiumi akinik qaffaffiusumi, siulersuisuni siulittaasoq Mona oqarpoq.

Juulimut pisiniutissamik tunisisut

Sermitsiaq.ag naapertorlugu ilaqutariit 250-it katillugit 500-it sinnerlugit meerartallit siorna pisiniutissaminnik tunineqarput.

Nuna Meeqqat juullimut ikiuisarnera ilaqutariinnut juullikkunni aningaasaqarnerminnik ataqatigiissitsiniarnerminnik ajornakusoortitsiunut pisiniutissamik tunisinermik ilaqartarpoq.

- NANUBØRN nittartagaani inuillu attaveqaqatigiittarfianni quppernerisatsinni ikiuukkumasunik ujarleraluarpugut, iluatsinngitsumik, Mona Steenholdt oqarpoq.

Nanu Meeqqat nammineq kajumissutsiminnik suliaqarfiuvoq – taamaammat suliaqarneq akissarsiaqarfiunngilaq – nunalu tamarkkerlugu suliniuteqartuulluni.