Nuummi portørit tallimanngorpat suliaminnik unitsitsigallalersut
Nuummi portørit tallimanngornermi maajip ulluisa 14-ianni 2021 suliaminnik unitsitsillutik ataatsimiissapput, suliallu tamarmik nalunaaqutaq qulinut unitinneqassallutik. Piffissami tassani inuunermik navialisitsisut kisimi suliarineqassapput.
Portørit suliassaqaraluttuinnarnertik ataatsimiissutigisariaqaramikku suliunnaarallarnissaminnut siunniussaqarput.
AAMMA ATUARUK Portørit SIK-p Namminersorlutik Oqartussallu isumaqatigiissutaannut pakatsisut
Suliassammi amerligaluttuinnartut sulisussanik ilaartorneqarneq ajorput.
Tusagassiuutinut portørit sinnerlugit, Ujarak Jessen Heinrich, taama allappoq.
Ukiuni kingullerni Nuup inuttussuseqaleraluttuinnarpoq. Assersuutigalugu ukioq 2020-mi Nuummi inuit 18.326-t najugaqarput. Ukioq manna inuit Nuummi najugaqartut 18.800-iupput, ukioq kingullermut naleqqiullugu 474-nik inoqarnerulersimalluni. Tamanna portørinut suliassiinerulerpoq, massa saniatigut suliassaqareeraluaqalutik.
Ataatsimiinissaq pillugu oqaaseqarusunngitsoq
Ujarak Jessen Heinrich ataatsimiittuni peqataasussaq, ataatsimiinermi susoqassanersoq oqaaseqarfigerusunngilaa. Ataatsimiineq matoqqasuunerarpaa, portørilli suliffimmini oqilisaataasinnaasunik suliniutissanik eqqarsaatersuuteqareersimanerarpai.
Suleqatigiissitaliassamut pilersinneqartussamut aamma aaqqissuusisuuvoq.
Portørinut nukinginnartitsisut ilagaat siorna suliffiit arlaqartut atorunnaarsinneqarmata.
Ullormi suliffiusumi portørit suliassarpassuaqartarput. Nuummi qaammammut agguaqatigiissillugit suliassat nukinginnartut 50-t nukinginnanngitsullu 150-t ambulancinik ingerlanneqartarput. Aalartussat tikittussallu minnerpaamik 40-t ullut tamaasa aaneqartarput.
Napparsimasut najugaqarfiinnut aaneqartussat, Dronning Ingridip napparsimmavissuaniit uninngavimmiit uninngavimmut ingerlatassat, eqqagassat, pilattaavimmukaasassat, tarnikkut napparsimasut uninngavianni pinartoqarisaarnissaanut piareeqqasutut. Kiisalu toqusut isumagineqarnissaat suliarineqartarput.
Portøriusimasup portøritullu suliaqartup suliartik pillugu misigissutsikkut attortissimaqalutik eqqartuinerat videokkut immiunneqarsimasoq, tuusintinik amerlanerusunit siammarterneqarsimasup kingunerisaanik, Inatsisartunut apriilimi qineqqusaartoqarnerani portøritut sulisut atugassarititaat eqqartorneqangaatsiarpoq.