Nuummi niuertarfik Bonus matulerpoq
Islandimi niuertarfissuit Bonus-inik atillit Danmarkimi Netto-nut assersuunneqarsinnaasut assinganik Nuummi pisiarniarfeqaleraluarpoq, massakkulli matusussanngormat ullumikkut nioqqutissat affaannarmik akeqartillugit nioqqutigineqarput.
Aningaasaliisussanik pissarsiniarneq ajornakusoorsimavoq, pisiniarfiullu ingerlaannarnissaanut 2-4 million koruunit amigaatigineqartut pisiniarfiutillip nassaarisinnaasimanngilai.
-Aningaasaliisussanik nassaarsinnaasimanngilanga, Grønlandsbankilu aningaasaliinerorusussimanngilaq. Taamaattumik aningaasanik amigaateqarpugut. Nioqqutissanik pisinissatsinnut aningaasaliisut pisariaqartissimavagut soorlu nillataartitsiviit qeritsitsiviillu pisiarinissaannut atugassat, Bonus-imik piginnittoq Poul Jensen oqarpoq.
Nuummi Bonus-imik piginnittup nammineq aningaasaatini 500.000 koruunit atorlugit niuertarfik aallartisarsimavaa.
- Tussunngunarpoq. Ullumikkut nioqqutissat nunguppata matussaagut. Sinneri nioqqutissanik pilersuisartumit aaneqarumaarput, Poul Jensen oqarpoq.
Nuummi niuertarfiup Bonus-ip Islandimi nioqqutissanik pisiortorfigisartagaata Poul Jensen-imut aningaaserivianullu piumasaqaatigisimavaa qularnaveeqqusiisoqarnissaa, tamannali pisinnaasimanngilaq. Taamaattumik Nuummi niuertarfimmut nioqqutissanik nassiusseqqikkusussimanngillat.
Niuertarfik 600 kvadratmeteriusoq nioqqutissanik ulikkaavissappat sapaatip akunneri pingasukkaarlugit containerersuit pingasut arfinillillu tikillugit amerlassuseqartut nioqqutissanik imaqartut tikisinneqartartussaagaluarput, containerip ataatsip nioqqutissanik imallip tikisinniarnera 200.000 koruuninik akeqarpoq.
- Pisiniartartut amerlagaluaqaat, kisianni nioqqutissat aamma pigineqartariaqaramik, Poul Jensen knr.gl-imut nassuiaavoq.
Nuummi Bonus-imik piginnittut allaanerusunik nioqquteqarnissartik tunngavigalugu pisiniarfik ingerlanniarnikuuaat, nioqqutissat Islandimeersut, Canadameersut, Amerikkameersullu nioqqutigalugit pisiniarfik ingerlanniarneqarnikuulluni. Nioqqutissat pisiniarfinni allani soorlu Pisiffimmi Brugsennimilu pisiarineqarsinnaanngitsut.
