Ingerlaaqatigiittut: Nuummi mittarfiup tallilerneqarnissaa akerlerigaat
Soqutigisaqaqatigiit Angisunnguaq Nuummi mittarfissap allilerneqarnissaa aaliangiunneqareeraluartoq, Mittarfiup anginerusussap maanna mittarfiusup nalaaniinnissaanut akerliupput.
Taakkua mittarfittaassap Nuup kujataani qeqertami Angisuunnguamiinissaa kissaatigaat.
Mittarfittaassarsuullu Angisunnguaaniitinneratigut periarfissanik allanik saqqummertoqarumaartoq taakku isumaqaramik.
- Mittarfitoqanngortussaq taanna inissianut 2000-it tikillugu missaannut ineqalersinnaavoq, taava inissianik ukiunik 20-25-it tikillugit utaqqisarneq, taanna annertoorujussuarmik periarfissatsialaasagaluarpoq.
AAMMA ATUARUK Mittarfiliornissamik suliniutissaq ukiuni 10-ni oqallisigineqareerluni piariilersoq
Nuummi mittarfik pioreersoq 2200 miiterimut allilernagu Nuup kujataani Angisunnguani nunanit tamalaanit timmisartunit mittarfissamik sanagaani pittaanerusoq, soqutigisaqaqatigiit isumaqarput.
- Takusinnaareerparput Siorarsiorfik ammarneqalerpoq, tassa qulakkeerneqareerpoq suliarissallugu. Taannaluunniit aaqqinnera eqqarsaatigalugu Angisunnguaq qanittuaranngussaaq, tassa una putorsuaq Siorarsiorfiup tungaannut aningaasatigut qulakkeereerami, Angisunnguami oqaaseqartartoq Christian Jeremiassen oqarpoq.
Tamanna Nuummi Borgmesterip Asii Chemnitz Narupip (IA) facebookimini uumitsaatigaa. Taasuma Namminersorlutik Oqartussani kommunimilu atorfilippassuit immikkullu ilisimasallit pitsaanerpaamik aaqqiissutissarsiorlutik suut tamaasa misissoreersimagaat:
- Aaqqissut pitsaanerpaanngilaq. Tamarmik iluarisarinngilaat. Kisianni aaqqiissutissaasinnaasuni pitsaanerpaavoq. Aaqqiissut piviusorsiornermi innuttaasut atugaannut eqqarsaatiginninnermik, sumiinnissaanik, avatangiisinik aningaasaqarnermik allanillu oqimaaqatigiisitsinerusoq.
Asii Chemnitz Narup aamma allappoq, Angisunnguami mittarfiliornissaq akisunerussasoq. Tamannalumi attaveqaqatigiinnermullu naalakkersuisup ilalerpaa.
Karl Frederik Danielsenip mittarfissuassap inissisimaffia aningaasaqarnermut pitsaanerpaasoq. Taassuma oqarnera naapertorlugu Angisunnguani mittarfilioraanni, tamanna allani mittarfiliortiternermut sunniuteqassasoq.
- Mittarfimmut aaqqiissutissami tassani sanaartornermut aningaasartuutit qaffasinnerat peqqutigalugu Ilulissani Qaqortumilu mittarfiliortoqarsinnaajunnaassaaq, inuiaqatigiit aningaasaqarnerannik naliliinerit inerneri ajornerungaatsialertussaammata, Karl Frederik Danielsen (S) Naalakkersuisut nittartagaani taama allappoq.
AAMMA ATUARUK Nuummi Ilulissanilu mittarfissat Kalaallit Airportsip suliariumannittussarsiuullugit aallartikkai
Christian Jeremiassenilu allannguinissamut suli periarfissaqarnerarpaa:
-Avatangiisinut pillugu allaaserinnittarneq apriilip 15-ani killeqarmat taamaammat suli periarfissaqarpugut suli isornartorsiutinik saqqummiussisinnaalluta.
